काठमाडौं – पश्चिमी न्यूनचापीय प्रणालीको आंशिक प्रभावले देशको मौसममा परिवर्तन आएको जल तथा मौसम विज्ञान विभागले जनाएको छ। कर्णाली र सुदूरपश्चिम प्रदेशका पहाडी भूभागमा आंशिक बदली भए पनि बाँकी स्थानमा मौसम सफा रहेको छ। तराईका धेरै भूभागमा बिहानैदेखि बाक्लो हुस्सु लागेको छ।
आजको अवस्था:
दिउँसो गण्डकी, कर्णाली र सुदूरपश्चिम प्रदेशका पहाडी भूभागमा आंशिकदेखि साधारण बदली रहनेछ। कर्णाली र सुदूरपश्चिमका उच्च पहाडी तथा हिमाली भेगमा केही स्थानमा हल्का हिमपातको सम्भावना छ। अन्य स्थानमा मौसम सफा रहनेछ।
रातको अवस्था:
गण्डकी, कर्णाली र सुदूरपश्चिमका पहाडी क्षेत्रमा आंशिकदेखि साधारण बदली कायम रहनेछ। गण्डकी, कर्णाली र सुदूरपश्चिमका उच्च पहाडी तथा हिमाली क्षेत्रका केही स्थानमा हल्का हिमपातको सम्भावना छ।
२४ घण्टाको सम्भावना:
कर्णाली र सुदूरपश्चिमका उच्च पहाडी तथा हिमाली भागमा केही स्थानमा हल्का हिमपात।
गण्डकीका उच्च पहाडी तथा हिमाली क्षेत्रका एक–दुई स्थानमा हल्का हिमपात।
बिहीबार बिहान तराईका धेरै स्थानमा बाक्लो हुस्सु पर्ने।
सतर्कता अनुरोध:
तराईमा लाग्ने हुस्सुले दैनिक जनजीवन, कृषि, स्वास्थ्य, यातायात तथा हवाई उडानमा असर पुर्याउन सक्ने भएकाले सतर्कता अपनाउन विभागले आग्रह गरेको छ। यात्रुहरू, किसान, र हवाई सेवा प्रदायकलाई आवश्यक तयारी गर्न अनुरोध गरिएको छ।
