काठमाडौँ — राष्ट्रपति रामचन्द्र पौडेलले आगामी निर्वाचनलाई दृष्टिगत गर्दै सर्वदलीय बैठक बोलाएका छन् । प्रधानमन्त्री सुशीला कार्कीसहित संसद्मा प्रतिनिधित्व गर्ने प्रमुख राजनीतिक दलका शीर्ष नेताहरूलाई समेट्दै राष्ट्रपति पौडेलले शुक्रबार दिउँसो ४ बजेका लागि शीतल निवासमा बैठक आह्वान गरेका हुन् ।
राष्ट्रपतिका अनुसार बैठकको उद्देश्य आसन्न चुनावका तयारी, निर्वाचन प्रक्रिया सहज र विश्वसनीय बनाउन आवश्यक राजनीतिक सहमति तथा उत्पन्न समसामयिक राजनीतिक अवस्थामाथि साझा धारणा बनाउने हो ।
सरकारले यसअघि फागुन २१ गतेका लागि आम निर्वाचनको मिति तोक्दै निर्वाचन आयोगमार्फत कार्यतालिका समेत सार्वजनिक गरिसकेको छ । तर, चुनावको मिति नजिकिँदै जाँदा पनि प्रमुख दलबीच आवश्यक संवाद र सहमति हुन नसकेको अवस्थाले राजनीतिक अनिश्चितता बढाएको टिप्पणी भइरहेको छ ।
यसअघि बिहीबार राष्ट्रपति पौडेल र प्रधानमन्त्री सुशीला कार्कीबीच शीतल निवासमा भेटवार्ता भएको थियो । सो भेटपछि राष्ट्रपति कार्यालयले राष्ट्रिय सहमति र चुनाव तयारीबारे विस्तृत छलफल गर्न सर्वदलीय बैठक बोलाइएको जनाएको छ ।
बैठकमा सत्तारूढ र विपक्षी दलका शीर्ष नेताहरू, पूर्वप्रधानमन्त्रीहरू, प्रमुख संवैधानिक निकायका प्रतिनिधिहरू तथा निर्वाचन आयोगका पदाधिकारीहरू समेत सहभागी हुने बताइएको छ ।
निर्वाचन मिति तोकिएपछि पनि दलहरूबीच मतभेद कायम रहँदा आगामी राजनीतिक प्रक्रियामा चुनौतिहरू थपिएको देखिएको छ । सर्वदलीय बैठकले त्यो दूरी घटाउने र राजनीतिक सहकार्यका लागि साझा बाटो निकाल्ने अपेक्षा गरिएको धेरैको धारण रहेको छ ।
