गुल्मी । गुल्मीको कालीगण्डकी गाउँपालिका–४ राक्सेमा ठूलो पहिरो खस्दा कालीगण्डकी करिडोर पूर्ण रूपमा अवरुद्ध भएको छ । आइतबार बिहानको अविरल वर्षापछि आएको पहिरोले करिडोर अन्तर्गतको सडक खण्ड पूरै अवरुद्ध बनेको जिल्ला प्रहरी कार्यालय गुल्मीले जनाएको छ ।
सडक अवरुद्ध भएपछि पर्वत, बागलुङ, रिडी हुँदै पाल्पा र बुटवलतर्फ जाने तथा त्यहाँबाट फर्किने सवारीसाधन बीच बाटोमै रोकिएका छन् । यात्रुहरु लामो समयदेखि सडक सुचारु हुने पर्खाइमा बसिरहेका छन् ।
प्रहरीका अनुसार पहिरो पन्छाउन डोजरसहितका उपकरण परिचालन गरिएको छ । स्थानीय सडक विभाग, प्रहरी र स्थानीयवासी मिलेर पहिरो पन्छाउने प्रयास भइरहेको भए पनि भारी मात्रामा ढुंगा–माटो खसेकाले सडक खुल्न केही समय लाग्ने अनुमान गरिएको छ ।
अवरुद्ध सडकका कारण बिरामी, विद्यार्थी तथा काम विशेषका लागि यात्रा गरेका सर्वसाधारणलाई सास्ती भएको छ । करिडोर अवरुद्ध हुँदा गुल्मी, पाल्पा, बागलुङलगायतका जिल्लाको आवत–जावत तथा आपूर्ति व्यवस्थामा पनि असर परेको छ ।
स्थानीय प्रशासनले यात्रुहरुलाई सम्भव भएसम्म वैकल्पिक मार्ग प्रयोग गर्न आग्रह गरेको छ । निरन्तर वर्षा भइरहेकाले अझै थप पहिरो खस्ने जोखिम पनि रहेको हुदा सबैलाई सचेत हुन आग्रह गरिएको छ ।
