काठमाडौँ, – गृहमन्त्री रमेश लेखकले त्रिभुवन अन्तर्राष्ट्रिय विमानस्थलको भिजिट भिसा प्रकरणमा संसदमै आधिकारिक जवाफ दिने बताएका छन्। बुधबार बसेको प्रतिनिधिसभा अन्तर्गतको राज्य व्यवस्था तथा सुशासन समितिको बैठकमा सांसदहरुले उठाएका प्रश्नको जवाफ दिंदै उनले सबै सांसदहरुलाई एकैचोटि जानकारी दिन संसदमा बोल्ने अनुमति दिन आग्रह गरे।
“यो विषयमा धेरै सांसदहरूको जिज्ञासा रहेकाले समितिमा मात्र नभई संसदमै सबै प्रश्नको उत्तर दिन चाहन्छु,” मन्त्री लेखकले बैठकमा भने।
त्रिभुवन विमानस्थल अध्यागमन कार्यालयका केही कर्मचारीमाथि अख्तियार दुरुपयोग अनुसन्धान आयोगले छानबिन गरिरहेको छ। यस विषयमा गृहमन्त्रीसमेत संलग्न भएको भन्दै विपक्षी दलहरुले संसद अवरुद्ध गर्दै आएका छन्।
यस्तै, बैठकमा राष्ट्रिय प्रजातन्त्र पार्टी (राप्रपा) का सांसद बुद्धिमान तामाङले राप्रपा नेताहरुको सुरक्षामा खटिएका सुरक्षाकर्मी फिर्ता किन बोलाइएको भन्ने प्रश्न उठाए। जवाफमा गृहमन्त्री लेखकले आन्दोलनका क्रममा भीड व्यवस्थापनका लागि ती सुरक्षाकर्मीलाई फिर्ता बोलाइएको र आन्दोलन समाप्त भएपछि पुनः खटाइने जानकारी दिए।
उनले गणतन्त्र, संघीयता र लोकतन्त्र नेपालको संविधानको मूल आधार भएको उल्लेख गर्दै यी व्यवस्थाबाट पछि फर्कन खोज्ने प्रयासले देशलाई अन्धकारमा लैजान सक्ने चेतावनी पनि दिए। “संविधान फाल्ने वा यसको आधारभूत संरचना उल्ट्याउने कोसिस कसैले गर्नु हुँदैन,” उनले स्पष्ट पारे।