अनिल नेपाली
कपिलवस्तु — राष्ट्रिय मुक्ति पार्टीका केन्द्रीय कार्यकारी सदस्य रवि दन्त मिश्रले देश आफ्नै विचार, संस्कृति र सभ्यतामा चल्न नसकेको टिप्पणी गरेका छन्। कपिलवस्तुको शिवराज नगरपालिकामा बसोबास गर्दै जनताको सेवामा निरन्तर क्रियाशील मिश्रले वर्तमान शासन प्रणाली र संविधानले जनतालाई उपेक्षा, विभेद, र शोषण गरिरहेको दाबी गरे। उनका अनुसार, जनतालाई न्याय दिलाउनु नै आफ्नो मुख्य कर्तव्य हो।
२०५९ सालमा मात्र २१ वर्षको उमेरमा राजनीतिक यात्रा सुरु गरेका मिश्र २०५४ सालमै लालपुर गाविसका अध्यक्ष बनेर जनताको जीवनस्तर उकास्ने प्रयासमा लागे। पहाडी र मधेसी समुदायबीचको दरार हटाउँदै समाजमा समानता ल्याउने उद्देश्यले उनले निरन्तर संघर्ष गरे।
२०७० सालको दोस्रो संविधानसभामा राष्ट्रिय सम्भावना पार्टी नेपालबाट उम्मेदवारी दिए पनि सफलता हात पार्न सकेनन्। त्यसपछि २०७४ सालमा कपिलवस्तु क्षेत्र नम्बर ३ ‘क’ बाट राष्ट्रिय जनता पार्टी (राजपा) को तर्फबाट प्रतिस्पर्धा गरे, तर ४२३ मतले पराजित भए।
निरन्तर असफलतासँग जुध्दै आएका मिश्र २०७९ सालमा लोसपा नेपालबाट पुनः उम्मेदवार बने, तर फेरि पनि ४ मतले पराजित भए। राजनीतिक संघर्षकै क्रममा पाँच वर्ष जेल जीवन व्यतीत गरेका उनले असफलतालाई पनि सफलताको प्रतीकका रूपमा लिए।
मिश्र भन्छन्, “क्षेत्रीयताको राजनीतिले जनतालाई पछाडि धकेलिरहेको छ। मेरो लक्ष्य जनताको सेवा हो, त्यसैले बिहानैदेखि रातिसम्म उनीहरूको काममा व्यस्त रहन्छु।”
