- संविधान संशोधनका लागि दुईतिहाइ बहुमत मात्र पर्याप्त नहुने रवि लामिछानेले बताउनुभयो।
- संशोधन प्रक्रियामा कानुनी र संवैधानिक जटिलताहरूलाई विशेष ध्यान दिनुपर्ने उहाँको भनाइ छ।
- संविधान संशोधन जस्तो संवेदनशील विषयमा भावनाभन्दा कानुनी प्रक्रियालाई प्राथमिकता दिनुपर्छ।
काठमाडौ -सत्तारूढ राष्ट्रिय स्वतन्त्र पार्टी (रास्वपा) का सभापति रवि लामिछानेले संविधान संशोधनका लागि प्रतिनिधिसभाको दुईतिहाइ बहुमत मात्र पर्याप्त नहुने बताउनुभएको छ ।
प्रतिनिधिसभाअन्तर्गतको राज्य व्यवस्था तथा सुशासन समितिको आजकाे बैठकमा बोल्दै सभापति लामिछानेले संविधान संशोधनको कानूनी र संवैधानिक प्रक्रियाका जटिलतातर्फ ध्यानाकर्षण गराउनुभएको हो ।
लामिछानेले राष्ट्रिय प्रजातन्त्र पार्टी (राप्रपा) लगायत दलहरूले संविधान संशोधनका लागि आवश्यक सङ्ख्या पुर्याउन सरकारलाई सहयोग गर्ने भनी दिएको अभिव्यक्तिको स्वागत गर्नुभयो । तर संशोधनका लागि प्रतिनिधिसभाको दुईतिहाइ सङ्ख्या मात्र अन्तिम आधार नभएको भन्दै उहाँले यसका अन्य प्रक्रियागत पक्षहरूलाई पनि उत्तिकै ध्यान दिनुपर्ने उल्लेख गर्नुभयो ।
सरकारलाई सहयोग गर्ने भावना र तत्परता देखाउने दलहरूप्रति आभार व्यक्त गर्दै सभापति लामिछानेले संविधान र कानूनको पूर्ण पालना गर्दै अघि बढ्नुपर्नेमा जोड दिनुभयो ।
उहाँले संविधान संशोधनजस्तो संवेदनशील विषयमा भावनाभन्दा पनि कानूनी र संवैधानिक प्रक्रियालाई प्राथमिकतामा राख्नुपर्ने बताउनुभयो ।
