कपिलवस्तु, – पूर्व–पश्चिम राजमार्ग अन्तर्गत कपिलवस्तुको बुद्धभूमि नगरपालिका–९ डुमरामा भएको मोटरसाइकल दुर्घटनामा एक जनाको मृत्यु भएको छ भने अर्का एक जना गम्भीर घाइते भएका छन्।
शुक्रबार दिउँसो करिब ३ बजेको समयमा युपी ५५ एभी ३४१२ नम्बरको भारतीय मोटरसाइकल अनियन्त्रित भई सडकछेउको रुखमा ठोक्किएर दुर्घटना भएको हो। दुर्घटनामा परेर कपिलवस्तु शुद्धोधन गाउँपालिका–६ का ३५ वर्षीय नरमुल्ला खानको घटनास्थलमै मृत्यु भएको इलाका प्रहरी कार्यालय गोरुसिङ्गेका प्रहरी निरीक्षक एवं प्रमुख विराज शर्मा पौडेलले जानकारी दिए।
मोटरसाइकल पछाडि सवार भारतको सिद्धार्थनगर जिल्लाका मुस्तक अहमद गम्भीर घाइते भएका छन्। उनलाई प्रारम्भिक उपचारपछि थप उपचारका लागि लुम्बिनी प्रादेशिक अस्पताल बुटवल पठाइएको प्रहरीले जनाएको छ।
दुर्घटना अत्यधिक गति र अनियन्त्रित सवारीका कारण भएको प्रारम्भिक अनुमान गरिएको छ। घटनाको थप अनुसन्धान भइरहेको इलाका प्रहरी कार्यालय गोरुसिङ्गेले जनाएको छ।
