- बाढीपहिरोले क्षति पुर्याएको बीपी राजमार्गको स्थायी पुनर्निर्माण कार्य तीव्र गतिमा अघि बढेको छ।
- आगामी दुई वर्षभित्र सडक र पुलसहितको पुनर्निर्माण सक्ने गरी काम भइरहेको छ।
- जाइकाको अनुदान र नेपाल सरकारको लगानीमा राजमार्गको स्तरोन्नति गर्न लागिएको हो।
काठमाडौ – बाढीपहिरोले क्षतिग्रस्त बीपी राजमार्गको स्थायी पुनर्निर्माण कार्यले तिव्रता पाएको छ । डिभिजन सडक कार्यालय भक्तपुरका अनुसार आउँदो वर्षाअघि नै जोखिमयुक्त ठाउँको पूर्वाधार निर्माण सक्ने लक्ष्य छ ।
कार्यालय प्रमुख सिनियर डिभिजनल इन्जिनियर सुमन योगेशका अनुसार काभ्रेतर्फका तीन सडकखण्डमा अहिलेसम्म २५ प्रतिशत काम सम्पन्न भइसकेको छ । सम्पूर्ण पुनर्निर्माण कार्य भने आउँदो दुई वर्षभित्र सक्ने लक्ष्य छ ।
क्षतिग्रस्त झन्डै ३० किलोमिटर सडकको पुनर्निर्माणमा दुई लेनको सडक र पाँचवटा पुललाई पनि दुई लेनमा स्तरोन्नति गरिने छ ।
यस काममा जापानी सहयोग नियोग जाइकाले झन्डै २ अर्ब ६३ करोड रुपैयाँ बराबरको अनुदान दिने समझदारी भइसकेको छ भने सरकारले कूल ८ अर्ब ५० करोड रुपैयाँको स्रोत सहमति दिएको छ ।
यो सडक नेपालको पूर्वी क्षेत्रलाई सङ्घीय राजधानी काठमाण्डौसँग जोड्न महत्त्वपूर्ण छ ।
रामेछाप, सोलुुखुम्बु, ओखलढुङ्गा, खोटाङ लगायतका जिल्लाबाट काठमाण्डौ आवातजावात गर्ने सबैजसो गाडीहरु यही सडक प्रयोग गर्छन् भने सिन्धुली, उदयपुर लगायत मध्यपहाड र पूर्वको पहाड तथा तराईबाट पनि छोटो दुरीमा रूपमा यही सडक प्रयोग हुन्छ ।
