मुगु । मुगु जिल्लाको छायाँनाथ रारा नगरपालिका–८ चुगा गाउँमा केही दिनअघि भएको आगलागीका पीडितलाई राहत सामग्री वितरण गरिएको छ।
देवलाल बिकको घरमा भएको आगलागीको घटनामा घर पूर्णरूपमा जलेर नष्ट भएको थियो। घटनापछि नेपाल खोज खबरका मुगु संवाददाता रतन रावलद्वारा समाचार सम्प्रेषण भएको २४ घण्टा नबित्दै राहत जुट्न थालेको हो।
विदेशमा रोजगारीका क्रममा कतारमा रहनुभएका मुगु छायाँनाथ रारा नगरपालिका–३ तुमका राजन रावलले पीडित परिवारलाई चामल, तेल, चिनी, मट मसला र स्वास्थ्य सामग्रीसहितका राहत सामग्री पठाउनुभएको छ। त्यस्तै छायाँनाथ रारा नगरपालिका–७ का विकास शाहीले समेत आर्थिक सहयोग गर्नुभएको छ। साथै छायाँनाथ रारा नगरपालिका ले पनि उक्त परिवार लाई आर्थिक सहयोग गरेको छ । छायानाथ रारा नगरपालिकाले खाद्यान्न सामग्री चामल तेल लत्ता कपडा त्रिपाल पाल हार्दिक सहयोगको लागि पनि कुरा अघि बढेको जानकारी गराउनुभएको छ।
स्थलगत रूपमा मुगु संवाददाता रतन रावलले घटनास्थल पुगेका थिए। उनले आगलागी पीडितका लागि स्थानीयवासी र परदेशी मुगुवासीहरूबाट सहयोग आउने क्रम निरन्तर जारी रहेको जानकारी दिएका छन्।
आगलागीबाट पूर्ण रूपमा घरबारविहीन बनेका देवलाल बिकका परिवार अहिले अस्थायी टहरामा बसोबास गर्दै आएका छन्। स्थानीय प्रशासनले पनि आवश्यक सहयोगको तयारी गरिरहेको बताइएको छ।
सामाजिक अभियन्ता र स्थानीयवासीहरूले भने सहयोगका लागि सबैलाई एकजुट हुन आग्रह गरेका छन्।
