धरान – धरान उपमहानगरपालिकाका मेयर हर्क साम्पाङले भोलि २०८२ भदौ २४ गतेलाई शोक विदा घोषणा गरेका छन्। उनले नगरका सम्पूर्ण सरकारी कार्यालय बन्द गर्न निर्देशन दिँदै हाल देशभर चलिरहेको Gen Z आन्दोलनमा ऐक्यबद्धता जनाउने बताएका छन्।
सामाजिक सञ्जालमार्फत आफ्नो निर्णय सार्वजनिक गर्दै साम्पाङले शोक विदाको कारण आन्दोलनका क्रममा निरपराध युवाको ज्यान गएको भन्दै श्रद्धाञ्जली अर्पण गर्ने बताए। उनले भने, “यो देश युवाको हो। उनीहरूको रगत र बलिदानलाई सम्मान गर्न हामी सबै संयमित र जिम्मेवार बन्नुपर्छ।”
साम्पाङले थप क्षति नहोस् भन्दै आन्दोलनलाई संयमित तर प्रभावकारी बनाउन आग्रह गरे। उनले आफू युवाको आन्दोलनसँगै रहेको स्पष्ट संकेत दिँदै, “I am with the youth, the people & the nation” भन्ने अभिव्यक्ति दिएका छन्।
धरान उपमहानगरपालिकाको यो निर्णयलाई धेरैले ऐतिहासिक मान्दै स्थानीय स्तरबाट आएको ठोस समर्थनका रूपमा व्याख्या गरेका छन्। अब भोलि धरान शहर शोकमा डुब्ने छ भने मेयर साम्पाङ प्रत्यक्षरूपमा युवाको आन्दोलनमा सहभागी हुने जनाएका छन्।
