लुम्बिनी – अर्घाखाँचीमा आउँदै गरेका चाडपर्वलाई लक्षित गर्दै नेपाल विद्युत प्राधिकरण, अर्घाखाँची वितरण केन्द्रले पोल–तार वरपरका रुखबिरुवा काट्ने र लाइन मर्मत गर्ने काम गर्ने भएको छ । यसै कारण भोलि भदौ २१ गते बिहान १० बजेदेखि बेलुकी ५ बजेसम्म केही क्षेत्रमा विजुली बन्द हुने भएको छ ।
प्राधिकरणले दिएको जानकारीअनुसार अर्घा सबस्टेशनबाट सञ्चालन हुँदै आएको ३३ केभी हंशपुर फिडर, ठाडा सबस्टेशनअन्तर्गतको ११ केभी सितापुर, सिद्धारा, जुकेना र सिमलपानी फिडर तथा फुदबाङ सबस्टेशनबाट सञ्चालन हुने सन्धिखर्क बजार फिडरमा पर्ने गाउँ–बस्ती र बजार क्षेत्रमा सो समयभरी विजुली बन्द हुनेछ । काम तोकिएको भन्दा छिट्टै सकिएमा लाइन चाँडै खोलिने समेत प्राधिकरणले जनाएको छ ।
वितरण केन्द्रका कर्मचारीहरूका अनुसार चाडपर्व नजिकिँदै गर्दा लाइन वरपरका बोटबिरुवा नकटाई छाड्दा झरी, हुरी वा चट्याङ लाग्दा ठूलो समस्या निम्तिन सक्ने भएकाले पहिल्यै जोखिम टार्न यस्तो काम थालिएको हो ।
यही कारणले केही घण्टा विजुली बन्द गर्नुपर्ने बाध्यता भएको र यसबाट उपभोक्तालाई असुविधा भएमा प्राधिकरण आफैँलाई दुःख लागेको उनीहरूको भनाइ छ । प्राधिकरणले सबै उपभोक्तालाई उक्त दिन बिहानदेखि बेलुकासम्म विजुली आउँदैन भन्ने कुरा ख्याल गरेर कामकाज मिलाइसक्न समेत अनुरोध गरेको छ ।
“उहाँहरूलाई पर्ने असुविधा हुन्छ भन्ने थाहा छ, तर लाइन मिलाउन र बोटबिरुवा काट्नैपर्छ, चाडपर्व नजिकिँदै गर्दा समस्या नहोस् भनेर हामीले यो काम गर्न लागेका हौँ,” वितरण केन्द्रका एक कर्मचारीले नेपाल खोजखबर लाई बताए।
