काठमाडौं । हाल देशमा पश्चिमी वायु र पश्चिमी न्यून चापीय प्रणालीको आंशिक प्रभाव कायम रहेको जल तथा मौसम विज्ञान पूर्वानुमान महाशाखाले जनाएको छ। यो प्रणालीका कारण सुदूरपश्चिम, कर्णाली, लुम्बिनी र गण्डकी प्रदेशमा आंशिकदेखि साधारण बदली रहेको छ भने अन्य प्रदेशहरूमा मौसम सामान्यतः सफा छ। साथै, तराईका केही क्षेत्रमा हुस्सु लागेको छ।
दिउँसोको मौसम
आज दिउँसो सुदूरपश्चिम, कर्णाली, लुम्बिनी र गण्डकी प्रदेशका साथै देशका पहाडी भूभागमा आंशिकदेखि साधारण बदली रहनेछ। लुम्बिनी, सुदूरपश्चिम र कर्णाली प्रदेशका केही स्थानमा तथा अन्य प्रदेशका पहाडी भेगका एक–दुई स्थानमा मेघगर्जन र चट्याङसहित हल्का वर्षाको सम्भावना रहेको छ। साथै, सुदूरपश्चिम, कर्णाली र गण्डकी प्रदेशका उच्च पहाडी तथा हिमाली क्षेत्रमा केही स्थानमा हल्का हिमपात हुनसक्ने सम्भावना छ।
रातिको मौसम
आज राति सुदूरपश्चिम र कर्णाली प्रदेशमा आंशिकदेखि साधारण बदली रहनेछ। अन्य पहाडी भूभागमा आंशिक बदलीको सम्भावना रहे पनि बाँकी क्षेत्रहरूमा मौसम मुख्यतः सफा रहने अनुमान गरिएको छ। गण्डकी, सुदूरपश्चिम र कर्णाली प्रदेशका पहाडी भागका केही स्थानमा तथा अन्य प्रदेशका पहाडी भेगका एक–दुई स्थानमा मेघगर्जन र चट्याङसहित हल्का वर्षा हुने सम्भावना छ। त्यस्तै, सुदूरपश्चिम, कर्णाली र अन्य प्रदेशका उच्च पहाडी तथा हिमाली भागमा हल्का हिमपातको सम्भावना रहेको छ।
आगामी २४ घण्टाको पूर्वानुमान
गण्डकी, सुदूरपश्चिम र कर्णाली प्रदेशका पहाडी भूभागका केही स्थानमा तथा लुम्बिनी लगायत अन्य प्रदेशका पहाडी भूभागका एक–दुई स्थानमा मेघगर्जन र चट्याङसहित हल्का वर्षा हुनसक्ने जल तथा मौसम विज्ञान महाशाखाले जनाएको छ। साथै, गण्डकी, सुदूरपश्चिम र कर्णाली प्रदेशका उच्च पहाडी तथा हिमाली भागका केही स्थानमा तथा अन्य प्रदेशका उच्च पहाडी र हिमाली भूभागका केही स्थानमा हल्का हिमपातको सम्भावना रहेको छ।
महाशाखाले दैनिक जनजीवन, स्वास्थ्य, सडक तथा हवाई यातायातमा मौसमको आंशिक प्रभाव पर्नसक्ने भएकाले आवश्यक सतर्कता अपनाउन अनुरोध गरेको छ।
