- कीर्तिपुरको राधास्वामी होल्डिङ सेन्टरमा बागमतीको बाढी पस्दा त्यहाँ रहेका सुकुम्बासीहरू पुनः विस्थापित भएका छन्।
- बाढीले लत्ताकपडा र खाद्यान्न भिजाएपछि प्रहरी टोलीले मध्यरातमा १५४ मध्ये ५४ जनाको उद्धार गरेको छ।
- उद्धार गरिएकाहरूलाई त्रिविको स्मृति भवनमा सारिएको छ भने अन्य केही आफन्तकोमा वा सुरक्षित स्थानमा बसेका छन्।
काठमाडौ – काठमाडौंको कीर्तिपुर नगरपालिका–१० सुन्दरीघाटस्थित ‘राधास्वामी सुकुमवासी होल्डिङ सेन्टर’ बाढीका कारण जलमग्न भएको छ।
गएराति बागमती नदीमा पानीको बहाव बढेर सरकारी होल्डिङ सेन्टरमै बाढी पसेपछि त्यहाँ आश्रय लिइरहेका सुकुम्बासीहरूलाई मध्यरातमा उद्धार गरिएको छ।
बाढीबाट जोगाउने भन्दै सरकारले नदी किनारका सुकुम्बासी बस्तीमा डोजर चलाएर उनीहरूलाई यस सेन्टरमा सारेको थियो। तर, सुरक्षित भनिएको स्थानमै बाढी पसेपछि सुकुम्बासीहरू पुनः विस्थापित हुन पुगेका छन्।
काठमाडौं प्रहरी परिसरका प्रवक्ता एसपी पवन भट्टराईका अनुसार मध्यराति करिब १ बजे सेन्टरमा बाढी पसेको थियो। बाढी घुँडासम्म आउने गरी छिरेपछि सुकुम्बासीहरूले प्रयोग गर्दै आएका लत्ताकपडा र खाद्यान्न भिजेका छन्।
राष्ट्रिय विपद् जोखिम न्यूनीकरण तथा व्यवस्थापन प्राधिकरणका अनुसार होल्डिङ सेन्टरमा रहेका कुल १५४ जनामध्ये ५४ जनालाई मात्र उद्धार गरी त्रिविको स्मृति भवनमा स्थानान्तरण गरिएको हो।
बाँकीमध्ये ६ जना होस्टलमा बसेको र ९४ जनाले सुरक्षित स्थानमा जान अस्वीकार गरेको प्राधिकरणले फेसबुकमार्फत जानकारी दिएको छ।
डुबान क्षेत्रमा उद्धार र सहयोगका लागि सशस्त्र प्रहरी र नेपाल प्रहरीका ६० जनाको संयुक्त टोली खटिएको थियो। उद्धार गरिएका बाहेक कतिपय स्थानीयहरू आफ्ना आफन्तकोमा गएका छन् भने केही सेन्टरकै आसपासमा बसेका छन्।
शनिबार बिहानदेखि विस्थापितहरूका लागि खाना, पानी र अन्य आवश्यक खाद्यान्नको व्यवस्थापन गर्ने कार्य भइरहेको प्राधिकरणले जनाएको छ।
