काठमाडौं,- सार्वजनिक यातायात केन्द्रीय महासंघ नेपालले यातायात व्यवस्था विभागले पुस ३ गते जारी गरेको सूचनाप्रति गम्भीर आपत्ति जनाएको छ।
विभागले सार्वजनिक, पर्यटक र दुबैनी (डिलक्स) यातायातका सवारी साधनहरूमा हाई सेक्युरिटी इम्बोस्ड नम्बर प्लेट अनिवार्य रूपमा जडान गर्नुपर्ने सूचना जारी गरेपछि महासंघले उक्त निर्णयप्रति आपत्ति जनाएको हो।
महासंघका अनुसार पूर्वसमन्वय बिना गरिएको यस्तो निर्णयले सम्पूर्ण यातायात व्यवसाय क्षेत्रलाई संकटमा पार्ने खतरा रहेको छ।
विशेषगरी देशको गोपनीयता, विदेशी कम्पनीसँगको सहयोग, यात्रु सेवामा प्रत्यक्ष असर, साथै यात्रुवर्ग र व्यवसायीमाथि अनावश्यक भार पर्ने भन्दै महासंघले निर्णयको पुनर्विचार गर्न माग गरेको छ।
प्रेस विज्ञप्तिमा भनिएको छ, “यातायात व्यवस्था क्षेत्रमा देखिएका अव्यवहारिक समस्या समाधान बिना सार्वजनिक, पर्यटक, दुबैनी तथा निजी सवारी साधनमा इम्बोस्ड नम्बर प्लेट जडान गर्नुपर्ने भनाइले यातायात व्यवसायी र सर्वसाधारणमा असमञ्जस र असन्तुष्टि बढाएको छ।”
महासंघले सरकार र सम्बन्धित निकायलाई समस्याको दीर्घकालीन समाधान खोज्दै मात्र यस्तो निर्णय लागू गर्न आग्रह गरेको छ। साथै, निर्णयले यात्रु तथा यातायात व्यवसायीको हकहितमाथि प्रहार नगर्न विभागलाई सचेत गराएको छ।
सार्वजनिक यातायात केन्द्रीय महासंघले अन्त्यमा यातायात व्यवसायसँग सम्बन्धित सबै सरोकारवालालाई एकजुट भई यो विषयमा आवाज उठाउन समेत आह्वान गरेको छ।
