- सुर्खेतको लेकबेंसीमा मोटरसाइकलको ठक्करबाट एक महिला गम्भीर घाइते भएकी थिइन्।
- उपचारका लागि विभिन्न अस्पताल लगिएकी ५५ वर्षीया आशा बुढाको मृत्यु भएको छ।
- घटनामा संलग्न १७ वर्षीय चालक र मोटरसाइकललाई प्रहरीले नियन्त्रणमा लिएको छ।
सुर्खेत।सुर्खेतको लेकबेंसी नगरपालिका–१०, झुप्रामा मोटरसाइकलको ठक्करबाट घाइते भएकी एक महिलाको उपचारका क्रममा मृत्यु भएको छ।
जिल्ला प्रहरी कार्यालय सुर्खेतका अनुसार भदौ २७ गते बिहान लेकवेशीबाट भुतचोकतर्फ आउँदै गरेको भे ६ प ४७३ नम्बरको मोटरसाइकलले पैदलयात्री वीरेन्द्रनगर नगरपालिका–१०, बरीपाटी निवासी ५५ वर्षीया आशा बुढालाई ठक्कर दिएको थियो।
मोटरसाइकल १७ वर्षीय मनोज आचार्यले चलाएका थिए। दुर्घटनामा गम्भीर घाइते बुढाको शरीरमा बाहिरी चोट नदेखिए पनि भित्री चोट लागेको र अवस्था अचेत रहेको प्रहरीले जनाएको छ।
दुर्घटनापछि बुढालाई उपचारका लागि सुरुमा माया नर्सिङ होम अस्पताल लगिएको थियो। त्यसपछि थप उपचारका लागि कर्णाली प्रदेश अस्पताल, कालागाउँ, सुर्खेत पठाइएको थियो। त्यहाँबाट थप उपचारका लागि नेपालगञ्जस्थित नसिंह होम रिफर गरिएको थियो।
बुढाको भदौ २८ गते बिहान ७ः२० बजे नरसिंह होम नेपालगञ्जमा उपचारकै क्रममा मृत्यु भएको प्रहरीले जनाएको छ।
