रुकुम – रुकुमपूर्वमा आधारित अनलाइन पोर्टल समावेशी मिडिया डट कम तेस्रो वर्षमा प्रवेश गरेको छ । नेपाल सरकार उद्योग, वाणिज्य तथा आपूर्ति मन्त्रालय मातहत कम्पनी रजिस्ट्रारको कार्यालयमा दर्ता भई २०८१ असोज २ गतेदेखि सञ्चालनमा आएको “समावेशी रुकुम मिडिया हाउस प्रा.लि.” अन्तर्गत यस अनलाइन मिडियाले निरन्तर दुई वर्षको सफल प्रकाशन यात्रा पूरा गरेको हो ।
स्थापना कालदेखि नै समावेशी मिडिया डट कम ले सत्य, तथ्य र निष्पक्ष पत्रकारितामा अडिग रहँदै ग्रामीण भेग, दुर्गम क्षेत्र र समाजका वञ्चित वर्गहरूको आवाजलाई प्राथमिकतामा राख्दै समाचार, विश्लेषण, विचार, विशेष खोज तथा अनलाइन सामग्री प्रस्तुत गर्दै आएको छ । डिजिटल माध्यमलाई उपयोग गर्दै सबै क्षेत्रका पाठक, दर्शक, श्रोतासँग प्रत्यक्ष जोडिने र सूचनाको पहुँच विस्तार गर्ने उद्देश्य यस मिडियाले अगाडि बढाएको छ ।
दुई वर्षको अवधिमा यस मिडियाले स्थानीय सरकार, समाज, राजनीति, कृषि, खेलकुद, शिक्षा, आर्थिक, फिचरलगायतका राष्ट्रिय र अन्तर्राष्ट्रिय महत्त्वका समाचार र विषयगत सामग्री प्रस्तुत गर्दै आएको छ । सम्पादकीय तथा विविध सामग्रीमार्फत लोकतन्त्र, सामाजिक न्याय, लैङ्गिक समानता र समावेशीकरणको पक्षमा निरन्तर अभिव्यक्ति दिँदै आएको छ ।
तेस्रो वर्षमा प्रवेशसँगै मिडियाले अझ प्राविधिक रूपमा सुदृढ, सामग्रीका हिसाबले विविध र समावेशी पत्रकारितामा थप अग्रसर हुने लक्ष्य राखेको अध्यक्ष तथा प्रबन्ध निर्देशक निराजन वि.क. (सिर्पाली) ले जानकारी दिनुभयो । उहाँले ग्रामीण भेगको आवाजलाई राष्ट्रिय मञ्चमा पु¥याउने आफ्नो संकल्प यथावत रहने उल्लेख गर्दै पाठक, विज्ञापनदाता, सरकारी तथा गैरसरकारी निकाय, पत्रकार तथा स्थानीय जनप्रतिनिधिहरूको सहयोगको अपेक्षा गर्नुभयो ।।
