काठमाडौ – प्रोशेस पाण्डेले जिते ‘भ्वाइस अफ नेपाल-६’ को उपाधि सांगीतिक रियालिटी शो ‘द भ्वाइस अफ नेपाल’ को छैटौं सिजनमा प्रोशेस पाण्डे विजेता बनेका छन्। उनले उत्कृष्ट गायन प्रदर्शन गर्दै अन्य प्रतिस्पर्धीहरूलाई पछि पार्दै उपाधि जितेका हुन्। यो सिजनको फाइनलमा रोशन राई उपविजेता बनेका थिए, भने प्रमेश राई तेस्रो र अर्पणा आचार्य चौथो स्थानमा रहे।
कस्तो थियो त सिजन ६ को विशेषता : यस सिजनमा कोचहरूमा उदय सोताङ, राजु लामा, मेलिना राई र पहिलोपटक कोच बनेका खेम सेन्चुरी थिए। खेम सेन्चुरीको टिमबाट प्रोशेस पाण्डे विजेता बनेका हुन्। शोको प्रारम्भ पुस महिनाको तेस्रो साताबाट हिमालय टिभी एचडी र हिमालय टिभी प्रिमियममा प्रसारण भएको थियो, साथै भ्वाइस अफ नेपालको युट्युब च्यानलमा पनि स्ट्रिमिङ गरिएको थियो।
प्रोशेस पाण्डेको यात्रा कस्तो रहेको थियो त प्रोशेस पाण्डेले ब्लाइन्ड अडिसनमा चारै कोचको कुर्सी घुमाउन सफल भएका थिए, जुन यस सिजनमा २५ जना प्रतिस्पर्धीहरूले हासिल गरेका थिए। यो संख्या अघिल्लो सिजनको तुलनामा उच्च रहेको थियो ।