कपिलवस्तु – सिद्धार्थनगर जिल्लाको खुनुवा नाकामा तैनाथ सुरक्षाकर्मीहरूले काठमाडौंबाट दिल्ली जाँदै गरेको एक नेपाली बस (ना. लु. ख ६९९८) बाट ठूलो मात्रामा गाँजा बरामद गरेका छन् । सो बसको चेकजाँच गर्ने क्रममा स्पिकरभित्र लुकाइराखिएको १४.३७६ किलो गाँजा फेला परेको हो । बरामद गाँजा थाइल्यान्डमा उत्पादन भएको पाइएको छ भने यससँगै दुई तस्करलाई पनि पक्राउ गरिएको प्रहरी जनाएको छ ।
बरामद सामानको अन्तर्राष्ट्रिय बजार मूल्य करिब १४ करोड भारतीय रुपैयाँ पर्ने बताइएको छ । सुरक्षाकर्मीहरूले गहिरो जाँच गर्दा स्पिकर अस्वाभाविक रूपमा भारी देखिएपछि खोल्दा भित्र १४२ प्याकेट गाँजा भेटिएको जनाइएको छ । पक्राउ परेका दुवै जना केरलका बासिन्दा रहेको र लामो समय थाइल्यान्डमा काम गरेर फर्किरहेका अवस्थामा समातिएको कस्टम अधिकृत अनिल सिंह बुशरले नेपाल खोजखबर डड्कम लाई बताएका छन् । दुबै जनामाथि लागुऔषध सम्बन्धी मुद्दा दर्ता गरी सिद्धार्थनगर जेल चलान गरिएको छ ।
यस्तै मकवानपुरतर्फबाट बीरगञ्ज आउँदै गरेको एक मिनी ट्रक (बा.२.ख ९५६९) अमलेखगञ्ज प्रहरीले चेकजाँच गर्ने क्रममा छतमा बनाइएको सिँढीभित्र लुकाइराखिएको २८ प्याकेट गाँजा बरामद गरेको छ । बरामद गाँजाको तौल २३६ किलो ७५० ग्राम रहेको प्रहरीले जनाएको छ ।
यस क्रममा मकवानपुरको कलैया नगरपालिका–१० का ३८ वर्षीय रमेश रुयांलाई पक्राउ गरिएको छ । बरामद गरिएको गाँजा र पक्राउ परेका अभियुक्तहरूलाई आवश्यक अनुसन्धानका लागि सम्बन्धित निकायमा बुझाइएको छ भने प्रहरीले यसलाई अन्तर्राष्ट्रिय स्तरको गाँजा तस्करीसँग सम्बन्धित घटना मान्दै अनुसन्धान अघि बढाएको प्रहरीले जनाएको छ ।
