काठमाडौं, भदौ २७ – काठमाडौं महानगरपालिकाले जेन–जी आन्दोलनका क्रममा निधन भएका व्यक्तिहरूको शव व्यवस्थापन तथा पीडित परिवारलाई सहयोगका लागि विशेष व्यवस्था गरेको छ।
महानगरले मृतकका परिवारलाई काठमाडौंसम्म ल्याउन यातायात सुविधा, बस्ने व्यवस्था, साथै घरसम्म शव पुर्याउन शववाहनको व्यवस्था मिलाएको छ। साथै, आन्दोलनमा घाइते भएका व्यक्तिहरूको उपचार, उपचारपश्चात् घर फर्किन यातायात व्यवस्थापन लगायत आवश्यक सहजीकरणका लागि विशेष टोलीसमेत परिचालन गरिएको छ।
महानगरपालिकाका अनुसार यो विशेष टोलीमा जगदीश अर्याल, विज्ञान घिमिरे र ईश्वर वाग्ले रहेका छन्। टोलीले पीडित परिवारलाई प्रत्यक्ष सहयोग, समन्वय र सहजीकरण गर्ने जिम्मेवारी पाएको छ।
महानगरपालिकाले पीडित परिवारलाई सहयोग पुर्याउनका लागि सम्पर्क नम्बरहरू पनि सार्वजनिक गरेको छ, जसका माध्यमबाट सहयोग तथा आवश्यक जानकारी लिन सकिने व्यवस्था मिलाइएको छ।
