काठमाडौं । ‘डिप फेक’ अडियो बनाएर आफ्नो चरित्रहत्या गर्न खोजिएको भन्दै राष्ट्रिय स्वतन्त्र पार्टी (रास्वपा)का उपसभापति स्वर्णिम वाग्ले निवेदन लिएर प्रहरीमा पुगेका छन् ।
नेपाल–भारत सीमाबारे आफ्नो डिप फेक अडियो बनाइएको भन्दै कारबाहीका लागि वाग्ले बुधबार साइबर अनुसन्धान ब्युरो पुगेका हुन् ।
ब्युरोका प्रवक्ता एवं प्रहरी उपरीक्षक (एसपी) दीपकराज अवस्थीका अनुसार वाग्लेले भारतीय प्रधानमन्त्री नरेन्द्र मोदीसित सीमाबारे संवाद गरेको जस्तो सुनिने अडियो आफ्नो नभएको भन्दै अनुसन्धानको माग गर्दै निवेदन दिएका हुन् ।
एसपी अवस्थीले भने, ‘‘वाग्लेले उक्त अडियोबारे मेरो होइन, अनुसन्धान गर्नुपर्यो भनेर उजुरी दिनुभएको छ । हामी अहिले विषय हेर्दैछौँ ।’’
