रुपन्देही – सैनामैना दुधराक्ष कप राष्ट्रिय क्लब स्तरीय पुरुष भलिबल प्रतियोगिताको उपाधिका लागि आज त्रिभुवन आर्मी क्लब र नेपाल पुलिस क्लब भिड्दै छन्।
पहिलो सेमिफाइनलमा आर्मीले मणिमुकुन्द भलिबल क्लबलाई पराजित गर्दै फाइनल यात्रा तय गरेको हो भने, दोस्रो सेमिफाइनलमा पुलिसले गण्डकी प्रदेश भलिबल क्लबलाई हराउँदै उपाधि दौडमा स्थान बनाएको हो।
प्रतियोगिताका विजेताले ५ लाख ५५ हजार ५५५ रुपैयाँ नगदसहित सिल्ड, मेडल, र प्रमाणपत्र प्राप्त गर्नेछन्। उपविजेताले ३ लाख ३३ हजार ३३३ रुपैयाँ, तृतीय स्थान हासिल गर्ने टोलीले १ लाख ११ हजार १११ रुपैयाँ, र सान्त्वना स्थान प्राप्त गर्ने टोलीले ५५ हजार ५५५ रुपैयाँ नगदसहित मेडल र प्रमाणपत्र पाउनेछन्।
यस्तै, उत्कृष्ट खेलाडीलाई १५ हजार ५५५ रुपैयाँ प्रदान गरिनेछ। स्पाइकर, डिफेन्डर, ब्लकर, सेटर, र प्रशिक्षकलाई जनही ७ हजार ७७७ रुपैयाँ नगद पुरस्कार प्रदान गरिने आयोजक दुधराक्ष क्लबले जनाएको छ।
