काठमाडौं । काठमाडौँ महानगरपालिकाका जनप्रतिनिधिहरू वाग्मती सफाइ अभियानमा सक्रिय हुँदै आएका छन्। शनिबार तिलगङ्गा निलो पुलमा महानगरपालिका–९ का वडाध्यक्ष रामजी भण्डारीको नेतृत्वमा ६१०औँ हप्ताको वाग्मती सफाइ सम्पन्न भयो।
वडासदस्यहरू टेकराज अधिकारी, रचना सुनाम, सृजना भेटवाल, कामनपा वडा नं ११ का अध्यक्ष हिरालाल तन्डुकारलगायत जनप्रतिनिधि, स्थानीयवासी, अधिकारसम्पन्न वाग्मती सभ्यता एकीकृत विकास समितिका कर्मचारी, काठमाडौँ उपत्यका खानेपानी लिमिटेड र वाग्मती सफाइ अभियानकर्मीको सक्रियतामा नदी किनारबाट तीन मेट्रिक टन नकुहिने फोहर व्यवस्थापन गरिएको छ।
कामनपा वडा नं ९ र ८ को संयुक्त पहलमा महानगरीय प्रहरी बलका प्रहरी नायब उपरीक्षक शिव पौडेलको नेतृत्वमा २० जनाको टोलीले तिलगङ्गा पुलदेखि प्रयागघाटसम्म दायाँबायाँ किनारमा सरसफाइ तथा बिरुवा गोडमेल गर्ने कार्यक्रमसमेत सुरु गरेको अभियानकर्मी किशोरसिंह शाहीले जानकारी दिए।
२०७० जेठ ५ गतेदेखि सुरु भएको वाग्मती सफाइ महाअभियान हरेक हप्ता नियमित रूपमा सञ्चालन हुँदै आएको छ। यसपटकको अभियानले स्थानीयवासी र जनप्रतिनिधिबीचको सहकार्यलाई थप मजबुत बनाएको देखिएको छ।
