काठमाडौं । जल तथा मौसम विज्ञान विभाग, मौसम पूर्वानुमान महाशाखाले हाल देशमा पश्चिमी वायूका साथै पश्चिमी न्यून चापीय प्रणालीको आंशिक प्रभाव रहेको जनाएको छ।
महाशाखाका अनुसार अहिले कोशी प्रदेशसहित देशका पहाडी भूभागमा आंशिकदेखि सामान्य बदली रही बाँकी भूभागमा आंशिक बदली वा सफा मौसम छ। तराईका केही स्थानमा हुस्सु र कुहिरो लागेको छ, जसले दैनिक जनजीवनमा आंशिक प्रभाव पार्ने सम्भावना छ।
आज दिउँसो:
देशका पहाडी भूभागमा आंशिकदेखि सामान्य बदली रहनेछ भने बाँकी भूभागमा आंशिक बदली वा सफा मौसम रहने अनुमान गरिएको छ। पहाडी क्षेत्रमा एक-दुई स्थानमा हल्का वर्षा हुन सक्ने सम्भावना छ भने उच्च पहाडी र हिमाली भूभागमा हल्का हिमपातको सम्भावना छ।
आज राति:
कोशी, गण्डकी र कर्णाली प्रदेशका पहाडी भूभागमा आंशिक बदली रहनेछ भने अन्य ठाउँमा मौसम खुल्नेछ। ती प्रदेशका उच्च पहाडी तथा हिमाली क्षेत्रमा एक-दुई स्थानमा हल्का हिमपात हुन सक्ने अनुमान गरिएको छ।
सतर्कता:
विशेषगरी बिहान तराईका केही स्थानमा हुस्सु र कुहिरो लाग्ने भएकाले जनजीवन, स्वास्थ्य, सडक तथा हवाई यातायात प्रभावित हुन सक्ने भन्दै महाशाखाले आवश्यक सतर्कता अपनाउन आग्रह गरेको छ।
