काठमाडौं – हाल देशमा पश्चिमी वायुको आंशिक प्रभाव कायम रहेको छ। कोशी, गण्डकी र कर्णाली प्रदेशका पहाडी भूभागमा आंशिक बदली रहे पनि अन्य क्षेत्रहरूमा मौसम सामान्यतया सफा रहेको जल तथा मौसम पूर्वानुमान महाशाखाले जनाएको छ। मध्य र पूर्वी तराईका केही स्थानहरूमा हुस्सु लागेको छ, जसले यातायात तथा जनजीवनमा केही प्रभाव पार्न सक्ने सम्भावना छ।
महाशाखाका अनुसार आज दिउँसो कोशी र गण्डकी प्रदेशका पहाडी क्षेत्रहरूमा आंशिक बदली रहनेछ भने अन्य भागमा मौसम सामान्यतया सफा रहनेछ। त्यस्तै, कोशी र गण्डकी प्रदेशका उच्च पहाडी तथा हिमाली क्षेत्रका एक-दुई स्थानमा हल्का हिमपातको सम्भावना रहेको छ।
आज राति पनि कोशी र गण्डकी प्रदेशका पहाडी भूभागमा आंशिक बदली रहनेछ भने अन्यत्र मौसम सफा रहनेछ।
महाशाखाले आगामी २४ घण्टाको मौसम पूर्वानुमान गर्दै कोशी र गण्डकी प्रदेशका उच्च पहाडी तथा हिमाली क्षेत्रका केही स्थानमा हल्का हिमपात हुने सम्भावना औंल्याएको छ। साथै, शुक्रबार बिहान तराईका केही भागमा बाक्लो हुस्सु लाग्न सक्ने भएकाले सतर्कता अपनाउन आग्रह गरिएको छ। हुस्सुका कारण दैनिक जनजीवन, स्वास्थ्य, सडक तथा हवाई उड्डयन क्षेत्रमा आंशिक असर पर्न सक्ने भएकाले विशेष सतर्कता अपनाउन महाशाखाले अनुरोध गरेको छ।
