बुटवल = पाल्पाको तिनाउ गाउँपालिका वसन्तपुरमा नेपाल-भारत सुरक्षा बैठक सम्पन्न भएको छ। बैठकमा सीमा क्षेत्रमा हुने अवैध क्रियाकलाप नियन्त्रण, सीमा स्तम्भहरुको मर्मत तथा सम्भार, दशगजा क्षेत्रमा अतिक्रमण लगायतका मुद्दामा छलफल गरिएको थियो।
सशस्त्र प्रहरी बल नेपाल र भारतीय सशस्त्र सीमा बलका उच्च अधिकारीहरूको उपस्थितिमा सम्पन्न उक्त बैठकमा सीमाक्षेत्रको अवैध गतिविधिहरु नियन्त्रण गर्ने उपायहरूमा गहिरो विचारविमर्श गरिएको छ। खासगरी, दशगजा क्षेत्रमा अवैध संरचनाहरु हटाउने र क्षेत्रको सफाइ तथा सौन्दर्यकरण गर्ने निर्णय गरिएको छ।
उक्त बैठकले मानव तस्करी, नक्कली मुद्रा, लागूऔषध र अवैध वन्यजन्तु तस्करीको नियन्त्रणका लागि दुवै देशका सुरक्षा बलबीच समन्वय र सहकार्य बढाउने प्रतिबद्धता जनाएको छ । सशस्त्र प्रहरी नायव महानिरीक्षक प्रदिप कुमार पालले संयुक्त गस्ती, हेल्थ डेस्क सञ्चालन र खेलकुद अभ्यासहरूको निरन्तरता सुनिश्चित गर्ने कुरा समेत रहने बताएका छन्।
