- बंगालको खाडीको चक्रवातका कारण नेपालका अधिकांश भू-भागमा वर्षा र हिमाली क्षेत्रमा हिमपात भइरहेको छ।
- आज दिनभर मौसम यस्तै रहने र साँझदेखि पूर्वी क्षेत्रमा भारी वर्षाको जोखिम बढेको छ।
- निरन्तरको वर्षालाई मध्यनजर गर्दै मौसम पूर्वानुमान महाशाखाले सबैलाई सतर्कता अपनाउन आग्रह गरेको छ।
काठमाडौ -बंगालको खाडीमा विकसित ‘अर्नब’ चक्रवातको प्रभावका कारण हाल नेपालका अधिकांश भू-भागमा वर्षा र हिमाली क्षेत्रमा हिमपात भइरहेको छ।
पूर्वदेखि लुम्बिनी प्रदेशसम्मका धेरै ठाउँमा हल्कादेखि मध्यम वर्षा भइरहेको छ ।
मौसमविद् विनोद पोखरेलका अनुसार बिहीबार रातिदेखि नै कोशीदेखि बागमती प्रदेशसम्मका अधिकांश स्थानमा एकनासको हल्का वर्षा जारी छ।
त्यस्तै, मध्यरातपछि लुम्बिनी र गण्डकी प्रदेशका पूर्वी भागहरूमा पनि वर्षा सुरु भएको छ।
आज दिनभरजसो मौसम यस्तै रहने र वर्षा निरन्तर हुने सम्भावना छ।
मौसमविद् पोखरेलका अनुसार अपराह्न वा साँझदेखि नेपालको पूर्वी आधा भू-भागमा भारी वर्षाको जोखिम रहेको छ। विशेषगरी रातिको समयमा ठूलो पानी पर्न सक्ने भएकाले सतर्कता अपनाउन आग्रह गरिएको छ।
यसैबीच, जल तथा मौसम विज्ञान विभाग, मौसम पूर्वानुमान महाशाखाका अनुसार पछिल्लो छ घण्टाको अवधिमा सबैभन्दा बढी काभ्रेपलाञ्चोकमा २० मिलिमिटर वर्षा रेकर्ड गरिएको छ। काठमाडौँ उपत्यका लगायत अन्य विभिन्न स्थानहरूमा पनि रातिदेखि नै लगातार झरी परिरहेको छ।
