- अक्कल कोपिला फाउण्डेसनले हुम्लाका ७० विद्यार्थीलाई शैक्षिक सामग्री वितरण गरेको छ।
- फाउण्डेसनले बहिरा संघको छात्रावासमा रहेका विद्यार्थीका लागि खाद्यान्न सहयोग गरेको छ।
- आर्थिक अभावले शिक्षा नरोकिने उद्देश्यका साथ दुर्गमका बालबालिकालाई सहयोग गरिएको हो।
रतन बहादुर रावल मुगु- दुर्गम हिमाली जिल्ला हुम्लामा आर्थिक अभावका कारण अध्ययनमा समस्या भोगिरहेका विद्यार्थीलाई लक्षित गर्दै अक्कल कोपिला फाउण्डेसनले सहयोग अभियानलाई निरन्तरता दिएको छ। फाउण्डेसन र स्पेनवासी पितरको आर्थिक सहयोगमा सर्केगाड गाउँपालिका–४ दुल्लीस्थित आधारभूत विद्यालयमा अध्ययनरत ७० जना विद्यार्थीलाई शैक्षिक सामग्री वितरण गरिएको छ।फाउण्डेसनका हुम्ला प्रतिनिधि तथा पत्रकार मोहनसिंह बुढा विद्यालयमै पुगेर विद्यार्थीहरूलाई उक्त सामग्री हस्तान्तरण गर्नुभएको हो। विद्यालयमा अध्ययनरत ७० जना विद्यार्थीलाई कापी, कटर, इरेजर, पेन्सिललगायतका आवश्यक स्टेशनरी सामग्री वितरण गरिएको छ। शैक्षिक सामग्री पाएपछि विद्यार्थीहरूमा पढाइप्रति थप उत्साह देखिएको विद्यालयले जनाएको छ।
त्यस्तै, हुम्ला बहिरा संघको छात्रावासमा रहेका विद्यार्थीहरूका लागि ५ बोरा चामल समेत सहयोग गरिएको छ। दैनिक जीवनयापनमा आवश्यक पर्ने खाद्यान्न सहयोगले छात्रावासमा बस्दै आएका विद्यार्थीलाई प्रत्यक्ष राहत पुगेको छ।
फाउण्डेसनका अध्यक्ष अक्कल बोहोरा हाल स्पेनमा बस्दै आउनुभएको छ। उहाँले हुम्ला मात्रै नभई छिमेकी जिल्ला मुगुका दुर्गम बस्तीमा रहेका विद्यालय र विद्यार्थीलाई समेत विभिन्न प्रकारका शैक्षिक तथा मानवीय सहयोग गर्दै आउनुभएको छ।
बोहोरा स्वयं मुगुको दुर्गम थार्पा गाउँमा जन्मिनुभएको हो। आफ्नो बाल्यकाल सम्झँदै उहाँले दुर्गम क्षेत्रका बालबालिकाले आर्थिक अभावका कारण कापी, कलमजस्ता सामान्य शैक्षिक सामग्रीसमेत जुटाउन नसक्ने अवस्था देखेपछि सहयोग अभियानलाई निरन्तरता दिँदै आएको बताउनुभएको छ।
‘आर्थिक अभावकै कारण कुनै पनि बालबालिका शिक्षाबाट वञ्चित हुनुहुँदैन’ भन्ने उद्देश्यका साथ फाउण्डेसनले दुर्गम क्षेत्रका विद्यार्थीलाई केन्द्रमा राखेर सहयोग गर्दै आएको छ। विद्यार्थीको शैक्षिक यात्रामा सानो सहयोगले पनि ठूलो अर्थ राख्ने भएकाले आगामी दिनमा समेत आवश्यकताका आधारमा सहयोगलाई निरन्तरता दिने फाउण्डेसनको भनाइ छ।
विद्यालयका प्रधानाध्यापक दन्त साउदका अनुसार सामग्री वितरण कार्यक्रममा स्थानीय जनप्रतिनिधि, राजनीतिक दलका प्रतिनिधि तथा अन्य सरोकारवालाको समेत उपस्थिति रहेको थियो। उहाँले दुर्गम क्षेत्रका विद्यार्थीलाई लक्षित गरी गरिएको सहयोगले विद्यालय र विद्यार्थी दुवैलाई उत्साहित बनाएको बताउनुभयो।
दुल्लीजस्तो दुर्गम क्षेत्रमा विद्यालय सञ्चालन भइरहे पनि कतिपय विद्यार्थीले आधारभूत शैक्षिक सामग्रीकै अभाव झेल्नुपर्ने अवस्था अझै रहेको छ। यस्तो अवस्थामा कापी, पेन्सिल, इरेजरलगायतका सामग्री प्राप्त हुँदा विद्यार्थीलाई नियमित अध्ययनमा सहज हुने विद्यालयको अपेक्षा छ।
एकातिर विद्यालयका ७० जना विद्यार्थीले अध्ययनका लागि आवश्यक स्टेशनरी सामग्री पाएका छन् भने अर्कोतर्फ हुम्ला बहिरा संघको छात्रावासमा रहेका विद्यार्थीले खाद्यान्न सहयोग प्राप्त गरेका छन्। यसले शिक्षा र मानवीय सेवामार्फत दुर्गम क्षेत्रका विद्यार्थीलाई सहयोग गर्ने अभियानको सकारात्मक उदाहरण प्रस्तुत गरेको छ।
स्थानीय स्तरमा गरिएको यस्तो सहयोगले विद्यार्थीको तत्कालीन आवश्यकता पूरा गर्नुका साथै ‘अभावकै कारण पढाइ रोक्नु हुँदैन’ भन्ने सन्देशसमेत दिएको छ। फाउण्डेसन, सहयोगदाता पितर तथा स्थानीय प्रतिनिधिको सहकार्यमा गरिएको यस अभियानबाट लाभान्वित विद्यार्थीहरू निकै हर्षित देखिएका छन्।
