भारतमा नेपाली संघ–संस्थाबीच एकताको सन्देशसँगै तीज सांस्कृतिक कार्यक्रमको  आयोजना

नोएडा — भारतमा रहेर विभिन्न क्षेत्रमा सक्रिय नेपाली संघ–संस्था तथा संगठनहरूबीच आपसी एकता, सहकार्य र सामाजिक सद्भावलाई थप मजबुत बनाउने उद्देश्यले नोएडामा विशेष कार्यक्रम आयोजना गरिएको छ।नेपाली समाज भारत, दिल्ली–एनसीआर राज्य समितिको आयोजनामा ‘एकता घोषणा सभा तथा तीज विशेष सांस्कृतिक कार्यक्रम’ आगामी २३ अगस्त २०२६, आइतबार नोएडामा हुने भएको हो।

कार्यक्रममार्फत  क्रियाशील नेपाली संघ–संस्थाबीचको सहकार्यलाई थप व्यवस्थित र संस्थागत बनाउँदै समुदायको साझा हितका विषयमा अघि बढ्ने वातावरण निर्माण गर्ने अपेक्षा गरिएको छ। कार्यक्रममा विभिन्न संघ–संस्थाका प्रतिनिधि तथा नेपाली समुदायका अगुवाहरूको सहभागिता रहने आयोजकले जनाएको छ।

एकातर्फ संघ–संस्थाबीच एकताको घोषणा र सहकार्यका विषयमा छलफल हुने भए पनि कार्यक्रमको अर्को मुख्य आकर्षण भने तीज विशेष सांस्कृतिक प्रस्तुति रहनेछ। नेपाली मौलिक कला, संस्कृति, परम्परा र पहिचानलाई प्रवासमा पनि जीवन्त राख्ने उद्देश्यले विभिन्न सांस्कृतिक प्रस्तुति राखिने बताइएको छ।

प्रवासमा हुर्किरहेको नयाँ पुस्तालाई नेपाली भाषा, संस्कृति र परम्परासँग जोड्दै लैजान यस्ता कार्यक्रम महत्वपूर्ण हुने आयोजकको विश्वास छ। तीजको अवसरलाई केवल मनोरञ्जनमा सीमित नराखी नेपाली समुदायबीचको आत्मीयता, भाइचारा र एकताको माध्यम बनाउने तयारी गरिएको छ।

कार्यक्रममा दिल्ली–एनसीआरमा सक्रिय सामाजिक, सांस्कृतिक, राजनीतिक, जातीय तथा सामुदायिक संघ–संस्थाका प्रतिनिधि, सञ्चारकर्मी, बुद्धिजीवी, समाजसेवीलगायत नेपाली समुदायको उल्लेख्य सहभागिता रहने अपेक्षा गरिएको छ। कार्यक्रम विवरण
कार्यक्रम: एकता घोषणा सभा तथा तीज विशेष सांस्कृतिक कार्यक्रम
मिति: २३ अगस्त २०२६, आइतबार समय: बिहान ११ बजेबाट
आयोजकले दिल्ली–एनसीआरअन्तर्गतका नगर समिति, पदाधिकारी, सदस्य तथा सम्पूर्ण नेपाली समुदायलाई कार्यक्रममा सहभागी भई एकता, सहकार्य र नेपाली मौलिक संस्कृतिको संरक्षणको अभियानलाई थप बलियो बनाउन आग्रह गरेको छ।

स्थान: होटल द एभरेस्ट–३०, सी–८६, सेक्टर–३०, नोएडा बोटानिकल गार्डन मेट्रो स्टेसन नजिक ।