बुटबल। श्री देबिनगर सरसफाइ तथा वातावरण संरक्षण सहकारी संस्था, बुटवल–११ ले संस्थाको स्थापना दिवसको अवसरमा शिवनगर सामुदायिक वन क्षेत्रमा अवस्थित नन्दनी गौशालामा आहार सामग्री प्रदान गरेको छ।
कार्यक्रम संस्थाका अध्यक्ष सुरेश पौडेलको अध्यक्षतामा सम्पन्न भएको थियो भने सञ्चालन संस्थाका सचिव हरि प्रसाद भट्टराईले गर्नुभएको थियो। कार्यक्रममा संस्थाका सदस्यहरू, लेखा समिति, सल्लाहकारज्यूहरू तथा लेखा समितिका सदस्यहरूको उपस्थिति रहेको थियो।
कार्यक्रमलाई सम्बोधन गर्दै संस्थाका अध्यक्ष सुरेश पौडेलले सहकारी केवल आर्थिक गतिविधिमा सीमित नभई समाज र वातावरणप्रति उत्तरदायी हुनुपर्ने बताए। उनले भने, “संस्थाको स्थापना दिवसलाई सामाजिक सेवासँग जोड्दै गौमाताको संरक्षण र वातावरणीय सन्तुलनका लागि सानो भए पनि सकारात्मक योगदान दिन पाउँदा हामी गौरवान्वित छौँ। आगामी दिनमा पनि यस्ता सामाजिक उत्तरदायित्वका कार्यक्रमलाई निरन्तरता दिनेछौँ।”
त्यसैगरी, कार्यक्रमका सञ्चालक तथा संस्थाका सचिव हरि प्रसाद भट्टराईले सरसफाइ, वातावरण संरक्षण र मानवीय मूल्य प्रवर्द्धन हाम्रो संस्थाको मूल लक्ष्य हो। नन्दनी गौशालामा गरिएको यो सहयोग त्यसैको निरन्तरता हो। सदस्यहरूको सक्रिय सहभागिताले यस्ता कार्यहरू सम्भव भएको जिकिर गर्नुभयो।।
उक्त अवसरमा आहार सामग्री गौशालाका व्यवस्थापक रानीकानु बानियालाई औपचारिक रूपमा हस्तान्तरण गरिएको थियो।
