इस्लामाबाद, मार्च ११, २०२५ – पाकिस्तानको बलुचिस्तान प्रान्तमा विद्रोहीहरूको आक्रमणपछि एक यात्रुबाहक रेल अपहरणमा परेको छ। क्वेटाबाट पेशावर गइरहेको जाफर एक्सप्रेस रेललाई बलुच लिबरेशन आर्मी (BLA) का लडाकुहरूले नियन्त्रणमा लिएका छन्।
घटनास्थल बलुचिस्तानको बोलन जिल्ला रहेको बताइन्छ। प्रारम्भिक रिपोर्टहरू अनुसार, विद्रोहीहरूले रेलमा गोलीबारी गर्दा चालक घाइते भएका छन्, जसका कारण रेल एक सुनसान क्षेत्रमा रोकियो। रेलमा करिब ४०० यात्रु रहेको अनुमान गरिएको छ। टाइम्स नाउ हिन्दीका अनुसार, आक्रमणमा ६ पाकिस्तानी सैनिक मारिएका छन् भने १२० यात्रुलाई बन्धक बनाइएको छ। BLA ले चेतावनी दिएको छ कि उनीहरूविरुद्ध सैन्य कारबाही भएमा सबै बन्धकहरूको हत्या गरिने बिद्रोह पक्षले बताएको समाचारमा उल्लेख छ।
बलुचिस्तान पाकिस्तानको सबैभन्दा ठूलो प्रान्त हो, जुन तेल, प्राकृतिक ग्यास, र खनिज स्रोतहरूले भरिपूर्ण छ। तर, त्यहाँका बलुच समुदायले लामो समयदेखि सरकारको विभेदकारी नीतिको विरोध गर्दै आएका छन्। बलुच लिबरेशन आर्मी जस्ता समूहहरूले विगतमा पनि रेलमार्ग, सुरक्षा चौकी, र सरकारी संरचनाहरूमा आक्रमण गर्दै आएका छन्।
पाकिस्तानी सुरक्षा बलहरूले बन्धकहरूको उद्धारका लागि विशेष अपरेशनको तयारी गरिरहेको बताइएको छ। रेल अपहरणबारे अझै स्पष्ट जानकारी प्राप्त हुन नसकेको भए पनि, सरकारले उच्च सतर्कता अपनाएको छ।
