अर्घाखाँची – भदौ २४ गते सिंहदरबारमा जेनजी युवाहरूको प्रदर्शनपछि भएको दनदनी आगलागीले राष्ट्र नै स्तब्ध भएको छ ।
नेपालको राजनीतिक, प्रशासनिक र न्यायिक संरचनाको केन्द्र मानिने सिंहदरबार, सर्वोच्च अदालत, संसद भवन, बालुवाटारलगायतका ऐतिहासिक संरचना जलेर खरानी भएपछि सम्पूर्ण नेपालीको मनमा पीडा, त्रास र चिन्ता थपिएको छ ।
यस्तै कठिन परिस्थितिमा अर्घाखाँचीका एक साधारण कृषकले राष्ट्रप्रतिको आस्था र कर्तव्यबोधलाई शब्दमा मात्र होइन, कर्ममा पनि उतार्दै सबै नेपालीलाई प्रेरणा दिने खालको योगदान गरेका छन् ।
जिल्लाको शीतगंगा नगरपालिका–२ निवासी किसान तुलसीराम अधिकारीले प्रधानमन्त्री दैवी प्रकोप सहयोग कोषमा रु. १ लाख १ सय जम्मा गरेका छन् । आफ्नै पसिना र मेहनतले खेतीपातीबाट अखबरे खुर्सानी बेचेर कमाएको रकम सहयोग गर्दै अधिकारीले भने–“फेरि यस्तो विपत्ति नहोस्, म बनाउँछु मेरो सिंहदरबार, म बनाउँछु मेरो देश, हामी सबै मिलेर बनाउँछौँ हाम्रो नेपाल ।” सहयोग हस्तान्तरणका क्रममा अधिकारीले भावुक हुँदै भने– “सिंहदरबार केवल एउटा भवन होइन, यो हाम्रो इतिहास र पहिचान हो ।
त्यसलाई जलेको देख्दा मेरो आस्था पनि जलेको जस्तो लाग्यो । अब सबै मिलेर यो मुलुकलाई जुरुक्क उठाउनुपर्छ ।”
प्रमुख जिल्ला अधिकारी गोपालप्रसाद अर्यालले कृषक अधिकारीको योगदानलाई विशेष उदाहरणको रूपमा लिँदै भने–“कृषि आम्दानीबाट आएको यो रकम पुनर्निर्माणमा ठूलो टेवा पुग्नेछ ।
यस्तो उदाहरणीय सहयोगले अरूलाई पनि राष्ट्रप्रतिको दायित्वबोध गर्न प्रेरित गर्नेछ, राष्ट्रलाई संकट परेको बेलामा हरेक नागरिकले हरेक क्षेत्रबाट सकेको सहयोग गर्नुपर्छ भन्ने सन्देश अधिकारीले दिनु भएको छ ।”
सिंहदरबार आगलागीपछि विभिन्न जिल्लाबाट सहयोगको लहर उठिरहेको छ । विद्यार्थी, व्यापारी, संघसंस्था, मजदुर र परदेशमा रहेका नेपालीहरू समेतले “सिंहदरबार पुनर्निर्माण” अभियानमा आ–आफ्नो तर्फबाट सहानुभूति र सहयोग व्यक्त गर्न थालेका छन् । रकम जम्मा गरेपछि अधिकारीले भौचर समेत प्रजिअलाई हस्तान्तरण गरेका थिए ।
भदौ २३ र २४ गतेको आन्दोलनमा सबैभन्दा बढी भदौ २४ गतेको घटनामा भएको आगलागीका कारण सिंहदरबार मात्र होइन, वरपरका ऐतिहासिक संरचना समेत क्षतिग्रस्त भएका छन् ।
आन्दोलनकै क्रममा ७२ जनाले ज्यान गुमाएपछि जनतामा गहिरो आक्रोश पैदा भएको छ । अपराधीलाई कडाभन्दा कडा कारबाही गर्नुपर्ने माग देशैभर गुन्जिरहेको छ ।
कृषक तुलसीराम अधिकारीको यो सहयोगले एउटा ठूलो सन्देश दिएको छ-राष्ट्र पुनर्निर्माण केवल सरकारको जिम्मेवारी मात्र होइन, नागरिकको पनि साझा दायित्व हो । जब एक सामान्य किसानले समेत पसिनाको कमाइ राष्ट्रका लागि अर्पण गर्न सक्दछन् भने, यस देशलाई फेरि उठाउन कठिन केही छैन ।
