काठमाडौँ – भारतीय विदेश सचिव विक्रम मिस्री आज बिहान नेपाल आइपुगेका छन्। परराष्ट्र मन्त्रालयका सचिव अमृतबहादुर राईको निमन्त्रणामा आएका उनले प्रधानमन्त्री केपी शर्मा ओलीको आसन्न भारत भ्रमणबारे छलफल गर्नुका साथै औपचारिक निमन्त्रणापत्र बुझाउने कार्यक्रम रहेको छ।
विशेष विमानमार्फत बिहान ९ बजे त्रिभुवन अन्तर्राष्ट्रिय विमानस्थलमा अवतरण गरेका मिस्री सिधै बालुवाटार पुगेर प्रधानमन्त्री ओलीसँग भेटेका छन्। त्यसपछि उनले राष्ट्रपति रामचन्द्र पौडेललाई शीतल निवासमा भेट्ने कार्यक्रम रहेको छ।
दिउँसो उनले बुढानीलकण्ठमा नेपाली कांग्रेस सभापति शेरबहादुर देउवासँग र खुमलटारमा माओवादी केन्द्र अध्यक्ष प्रचण्डसँग भेटघाट गर्नेछन्। त्यसपछि परराष्ट्र मन्त्रालयमा सचिवस्तरीय बैठक हुने र परराष्ट्रमन्त्री डा. आरजु राणा देउवासँग पनि भेटवार्ता हुने कार्यक्रम रहेको छ।
परराष्ट्र सचिव राईले मिस्रीको सम्मानमा रात्रीभोजको आयोजना गर्नेछन्। भदौ २ गते उनले पशुपतिनाथको दर्शन गरेर स्वदेश फर्कने तय भएको छ। यस क्रममा प्रधानमन्त्री ओलीको भारत भ्रमणका एजेन्डा तय गर्ने र भ्रमण लम्ब्याउने विषयमा पनि छलफल हुने मन्त्रालय स्रोतले जनाएको छ।
