अमेरिकी राष्ट्रपति डोनाल्ड ट्रम्पले भारतबाट आयात हुने वस्तुहरूमा भोलि अर्थात अगस्ट १ देखि लागू हुने गरी २५ प्रतिशत भन्सार कर लगाउने घोषणा गर्नुभएको छ ।
उहाँले सामाजिक सञ्जाल ट्रुथ सोशलमा पोष्ट गर्दै भारतले रूसबाट ठूलो मात्रामा सैन्य उपकरण र ऊर्जा खरिद गरिरहेको आरोप लगाउँदै यो स्वीकार्य नभएको बताउनुभयो ।
त्यसको बदलामा भारतले २५ प्रतिशत भन्सार कर तिर्नुपर्ने राष्ट्रपति ट्रम्पले बताएको बीबीसी हिन्दीले जनाएको हो ।
भारत र अमेरिकाबीच गएको केही महिनादेखि निष्पक्ष र पारस्परिक लाभदायक व्यापार सम्झौताका लागि वार्ता चलिरहेको थियो, तर कुनै औपचारिक सम्झौता घोषणा भइसकेको थिएन ।
यस घटनापछि भारतको वाणिज्य तथा उद्योग मन्त्रालयले प्रतिक्रिया दिँदै भारत सरकारले अमेरिकी राष्ट्रपति ट्रम्पको भनाइबारे जानकारी लिएको र यसको सम्भावित प्रभावको अध्ययन गरिरहेको जनाएको छ ।
यसैबीच, भारतीय विपक्षी दल कांग्रेसले सरकारको विदेश नीतिलाई विफल भएको बताउँदै प्रधानमन्त्री मोदीको ट्रम्पसँगको मित्रताको मूल्य पूरा देशले चुकाउनुपरेको आरोप लगाएको छ । सत्तारुढ भारतीय जनता पार्टीका सांसदले अमेरिकी पक्षसँग फेरि संवाद गर्नुपर्ने बताएका छन ।
यसअघि ट्रम्पले एअर फोर्स वन विमानमा पत्रकारहरूसँगको कुराकानीमा पनि भारतमाथि कडा भन्सार कर लगाउने सङकेत बतायको थियो ।
