दिनेश खत्री
राष्ट्रिय स्वतन्त्र पार्टीका सभापति रवि लामिछानेमाथि भइरहेको राज्यपक्षीय प्रतिशोधका विरुद्ध देश–विदेशमा जनताको हस्ताक्षर अभियान तीव्र रुपमा अघि बढिरहेको छ।
अभियानले अब प्रवासी नेपाली श्रमिकबीच समेत उल्लेखनीय समर्थन पाउन थालेको छ।
मलेसियामा कार्यरत नेपाली श्रमिकहरूबीच पनि यो अभियानले ठूलो उत्साह सिर्जना गरेको छ। त्यहाँका विभिन्न क्षेत्रमा कार्यरत नेपालीहरूबाट हालसम्म १०० जनाले अभियानमा हस्ताक्षर गरेका छन्।
उनीहरूले रवि लामिछानेमाथि राज्य संयन्त्रमार्फत गरिएको राजनीति प्रेरित कारबाहीको विरोध गर्दै अभियानमा ऐक्यबद्धता जनाएका हुन्।
हस्ताक्षर गर्ने श्रमिकहरूले “हामी परदेशमा श्रम गरेर देशका लागि रेमिट्यान्स पठाइरहेका छौं।
देशका लागि सोच्ने नेताहरूलाई यसरी राज्यद्वारा निशाना बनाउनु अन्याय हो। हाम्रो समर्थन न्यायको पक्षमा छ।”
यो अभियान अहिले सामाजिक सञ्जालमार्फत र भौतिक रूपमा हस्ताक्षर संकलन गर्दै देशका विभिन्न जिल्ला र प्रवासी नेपाली समुदायमा फैलिँदै गएको छ।
अभियानकर्मीहरूका अनुसार यो आन्दोलन कुनै राजनीतिक दलको हैन, न्याय र स्वतन्त्रताको पक्षमा जनताको आवाज हो।
रवि लामिछानेमाथिको पछिल्लो राजनीतिक तथा कानुनी घटनाक्रमप्रति असन्तुष्टि जनाउँदै सर्वसाधारण नागरिक, युवाहरू, तथा प्रवासी नेपालीहरू समेत आवाज उठाउन थालेका छन्।
