काठमाडौं । सञ्चार तथा सूचना प्रविधि मन्त्री पृथ्वीसुब्बा गुरुङले राजावादी समूहहरू संविधानविपरीत गतिविधिमा संलग्न भएको भन्दै सरकार चुप लागेर नबस्ने चेतावनी दिएका छन्।
बिहीबार मन्त्रिपरिषद् बैठकका निर्णय सार्वजनिक गर्न आयोजित पत्रकार सम्मेलनमा बोल्दै मन्त्री गुरुङले गणतन्त्र, लोकतन्त्र र प्रजातन्त्रविरोधी गतिविधि बढ्दै गएको भन्दै गम्भीर चिन्ता व्यक्त गरे।
उनका अनुसार, “संविधानमै राजतन्त्र पुनःस्थापनाको कुरा स्वीकार्य छैन। देशलाई विखण्डनतर्फ लैजाने, हिंसा, आगजनी, हत्या र लुटपाटजस्ता संविधान विरोधी कार्यहरूबाट गणतन्त्रलाई चुनौति दिने प्रयास भइरहेको छ।”
मन्त्री गुरुङले जेठ १५ गतेलाई ऐतिहासिक दिनका रूपमा स्मरण गर्दै त्यस दिन संघीय लोकतान्त्रिक गणतन्त्रको स्थापना भएको बताउँदै त्यसको भव्य र गरिमापूर्ण रूपमा सरकारबाट célébration गरिने जानकारी दिए। उनले भने, “उक्त दिन राजावादीहरूबाट गणतन्त्रविरोधी प्रदर्शनको प्रयास भइरहेको छ। हामीले अभिव्यक्ति र प्रदर्शनको अधिकार दिएका छौँ, त्यो कमजोरी होइन। यो हाम्रो उदारता हो।”
तर, मन्त्री गुरुङले सरकारलाई कमजोर नठान्न आग्रह गर्दै स्पष्ट शब्दमा भने, “संविधान विरोधी गतिविधि निरन्तर भइरहे सरकार टुलुटुलु हेरेर बस्दैन। आवश्यक परे प्रतिवाद हुन्छ र त्यो प्रतिवाद संविधानको दायराभित्रै हुन्छ।”
उनले संवैधानिक रूपमा यस्ता गतिविधिमा प्रतिबन्ध लगाउने छुट सरकारसँग भएको पनि स्मरण गराए। तर अहिलेसम्म त्यस अधिकारको प्रयोग नगरेको बताए। “संविधानभित्र बसेर विचार राख्न पाइन्छ, तर संविधानमाथि नै प्रहार गर्ने छुट कसैलाई छैन,” उनले भने।
