- युवाहरूले सामाजिक सद्भाव खलबल्याउने काम नगरी एकता कायम राख्न जिम्मेवार बन्नुपर्छ।
- सामाजिक सञ्जालमा भ्रम र घृणा फैलाउनुको साटो तथ्यमा आधारित विचार व्यक्त गर्नुपर्छ।
- समाजको वास्तविक पहिचान कायम राख्न आपसी समझदारी र सहिष्णुतालाई प्राथमिकता दिनुपर्छ।
लक्ष्मण सुनार अर्घाखाँची -पछिल्लो समय विशेषगरी हाम्रा नवयुवाहरूबाट सामाजिक सद्भावमा खलल पुर्याउने, समाजमा अनावश्यक मतभेद सिर्जना गर्ने र आपसी द्वन्द्व निम्त्याउने खालका गतिविधिहरू देखिनु अत्यन्तै दुःखद र चिन्ताजनक विषय हो।
विविध संस्कृति, विविध भेषभूषा, विविध जातजाति र फरक-फरक परम्परालाई आत्मसात् गर्दै आपसी समझदारी, सहिष्णुता र सद्भावका साथ मिलेर बसेको हाम्रो समाज नै हाम्रो वास्तविक पहिचान हो। यस्तो सामाजिक एकता र भाइचारालाई कमजोर बनाउने कुनै पनि गतिविधि समाजको हितमा हुन सक्दैन।
यसै सन्दर्भमा, सामाजिक सञ्जालको दुरुपयोग गर्दै समाजमा घृणा फैलाउने, समुदायबीच अविश्वास पैदा गर्ने र आन्तरिक द्वन्द्व निम्त्याउने प्रवृत्तिलाई बढावा दिनेहरूलाई म स्पष्ट सन्देश दिन चाहन्छु— सामाजिक सञ्जालमा केही लेख्नुअघि विषयवस्तुको गहिरो अध्ययन गर्नुहोस्, तथ्य बुझ्नुहोस् र आफ्नो अभिव्यक्तिले समाजमा कस्तो प्रभाव पार्छ भन्ने कुराको जिम्मेवारी लिनुहोस्।
नवयुवाहरू समाज परिवर्तनका संवाहक हुन्। उनीहरूको ऊर्जा, सोच र क्षमतालाई समाजलाई जोड्न, सकारात्मक परिवर्तन ल्याउन र आपसी सद्भाव बलियो बनाउन प्रयोग गरिनुपर्छ; समाजलाई विभाजित गर्न होइन।
आलोचना गर्न पाइन्छ, विचार राख्न पाइन्छ र असहमत हुन पनि पाइन्छ। तर असहमतिको नाममा सामाजिक सद्भावमाथि प्रहार गर्ने, जातजाति तथा समुदायबीच वैमनस्य फैलाउने र समाजलाई द्वन्द्वतर्फ धकेल्ने गतिविधिलाई स्वीकार गर्न सकिँदैन।
त्यसैले समाजमा भ्रम, घृणा र विभाजन फैलाउनेहरूलाई मेरो स्पष्ट चुनौती छ— तथ्य र तर्कका आधारमा विचार राख्नुहोस्, जिम्मेवार नागरिकको भूमिका निर्वाह गर्नुहोस् र सामाजिक सद्भाव कायम राख्न सहयोग गर्नुहोस्।
हामीलाई विभाजन होइन, एकता चाहिएको छ। घृणा होइन, सद्भाव चाहिएको छ। द्वन्द्व होइन, आपसी समझदारी चाहिएको छ।
हाम्रो सामाजिक एकता नै हाम्रो शक्ति हो। यसलाई कमजोर बनाउने होइन, अझ बलियो बनाउने जिम्मेवारी हामी सबैको हो।
