रुपन्देही। राष्ट्रिय स्वतन्त्र पार्टी (रास्वपा) का महामन्त्री सुनिल लम्सालले परिवर्तन सहज नहुने तर असम्भव पनि नभएको बताएका छन्।
सामाजिक सञ्जाल फेसबुकमार्फत आफ्नो धारणा सार्वजनिक गर्दै महामन्त्री लम्सालले परिवर्तन सजिलै नआउने र त्यसका लागि समय लाग्ने उल्लेख गरेका छन्। तर परिवर्तन अत्यन्तै गाह्रो विषय नभएको उनको भनाइ छ।
उनले परिवर्तनको सुरुवात सोचबाट हुनुपर्ने र त्यसपछि देशमा देखिनुपर्ने उल्लेख गरेका छन्। “परिवर्तन सोचमा आउनुपर्छ, देशमा आउनुपर्छ,” उनले लेखेका छन्।
महामन्त्री लम्सालले देशमा विद्यमान भ्रष्टाचारप्रति असन्तोष व्यक्त गर्दै भ्रष्ट प्रवृत्तिका कारण नागरिकहरू विदेशिन बाध्य भइरहेको बताएका छन्। “भ्रष्टहरूले आज हामीलाई विदेश लखेटिरहेका छन्, भोलि हाम्रो पालो आउँछ,” भन्दै उनले वर्तमान अवस्थाप्रति चेतावनी दिएका छन्।
यसैबीच, महामन्त्री लम्सालले रूपन्देही क्षेत्र नम्बर १ बाट आसन्न फाल्गुन २१ गतेको प्रतिनिधिसभा निर्वाचनमा उम्मेदवारी दिने चर्चा पनि राजनीतिक वृत्तमा भइरहेको छ।
