काठमाडौँ । पूर्वप्रधानमन्त्री तथा नवगठित प्रगतिशील लोकतान्त्रिक पार्टी (प्रलेपा) का संरक्षक डा. बाबुराम भट्टराईले आफ्नो पार्टीलाई जेन–जी आन्दोलनको प्रत्यक्ष उपज भएको बताएका छन्।
आइतबार काठमाडौँमा आयोजित पार्टी घोषणा सभामा सम्बोधन गर्दै उनले प्रलेपालाई जेन–जी पुस्ताको चेतना, ऊर्जा र मुद्दाबाट जन्मिएको नयाँ राजनीतिक शक्तिका रूपमा बुझ्न सबैलाई आग्रह गरे।
उनका अनुसार नयाँ पुस्ताको सोच, आवाज र परिवर्तनको आकांक्षालाई आत्मसात् नगर्ने हो भने प्रलोपाको अस्तित्व नै अर्थहीन हुनेछ।
डॉ. भट्टराईले भने, “यो पार्टी भनेको जेन–जी आन्दोलनको उपज हो। जेन–जी पुस्ताको पार्टी भनेर बुझिएन भने यसको कुनै अर्थ हुँदैन। अबको मुख्य एजेन्डा भनेकै युवापुस्ताको चेतना, आवाज र वर्तमान युगका चुनौती–अपेक्षासँग पार्टीलाई जोड्नु हो।”
उनले पार्टी नेतृत्व, नीति तथा कार्यक्रम सबैले युवा पुस्ताको माग पूरा गर्न सक्षम भएको प्रमाणित गर्नुपर्ने उल्लेख गरे।
डॉ. भट्टराईले पुरानै शैली, पुरानै बखान र नेतामुखी राजनीति छोडेर युगानुकूल, डिजिटल पुस्ताको आकांक्षा पूरा गर्ने वैकल्पिक राजनीतिक अभ्यास विकास गर्नुपर्नेमा जोड दिए।