काठमाडौँ । नेकपा (एमाले)का अध्यक्ष तथा पूर्व प्रधानमन्त्री केपी शर्मा ओलीले पार्टीका विगतका नेता–कार्यकर्तालाई आफ्नै “राजनीतिक घर फर्किन” आह्वान गरेका छन् । लोकतन्त्र, राष्ट्रिय स्वाधीनता र विकासको यात्रामा एमालेले खेलेको ऐतिहासिक भूमिकालाई स्मरण गर्दै उनले अहिले फेरि देशको अस्तित्वमाथि संकट आइरहेको बताएका छ्न ।
ओलीले भने, “निरंकुशताको अन्धकार हटाएर लोकतन्त्रको उज्यालो फैलाउने संघर्षमा एमाले सधैं अग्रपंक्तिमा रह्यो । अनेकौं प्रहार खेपेर राष्ट्रिय स्वाधीनता जोगाउने बलियो कवच यही पार्टी बन्यो । देशभक्तिको भावना जगाउने र विकासका संरचना निर्माण गर्ने कामको नेतृत्व पनि यही पार्टीले गरेको हो ।”
उनका अनुसार, एमाले केवल एउटा राजनीतिक संगठन होइन, जनताको रगत, पसिना र आँसुबाट बनेको विशाल परिवार हो । “यो पार्टीको जग बसाल्न तीन पुस्ताले आफ्नो जीवनका उज्याला क्षण समर्पण गरेका छन् । कसैले जेलयातना भोगे, कतिले जीवन बलिदान गरे, कसैले आफ्नो युवावस्था आन्दोलनमा अर्पण गरे, धेरैले सानो–ठूलो योगदान गरेर यो घर अड्याए,” ओलीले उल्लेख गरेका छ्न ।
अध्यक्ष ओलीले देशको सार्वभौम अस्तित्वमाथि फेरि चुनौती खडा भइरहेको बताउँदै भने, “अहिले लोकतान्त्रिक संविधानमाथि आक्रमण भइरहेको छ । यस्तो बेला हामी मौन रहन सक्दैनौं । राष्ट्रिय एकता, स्वाभिमान र लोकतन्त्रको रक्षाका लागि हामी सबै एकै मन, एकै स्वर र एकै दिशामा अघि बढ्नुपर्छ ।” उनले बताएका छ्न
त्यस अवसरमा उनले सबै नेता र कार्यकर्तालाई एकताका साथ अघि बढ्न आग्रह गर्दै भने, “जहाँ हुनुहुन्छ, फर्किनुस् आफ्नै घर फर्किनुस् । यो घर तपाईंहरूको पसिना र रगतले बनेको हो । फेरि हामी सबै काँधमा काँध मिलाएर अघि बढौं — देशको स्वाधीनता जोगाऔं, लोकतन्त्रको रक्षा गरौं र जनताको जीवनमा सुख, समृद्धि र आशाको ज्योति बालौं ।”
ओलीले एमालेलाई “जनताको विश्वासको घर”का रूपमा परिभाषित गर्दै राष्ट्रिय पुनर्जागरणको मुटु बन्ने दाबी गरे । उनले भने, “हामी एउटै परिवार हौं, हाम्रो लक्ष्य स्पष्ट छ — समृद्ध नेपाल, सुखी नेपाली । कोही अलमलमा नपर्नुस्, आउनुस् आफ्नै घरमा फर्किनुस् । साझा सपना साकार पार्न निर्णायक राष्ट्रिय शक्ति निर्माणमा जुटन समेत आग्रह गरेका छ्न ।
उनले अन्त्यमा जोड दिदै भनेका छ्न “एमालेले सुरु गरेको परिवर्तनको यात्रालाई कुनै शक्ति रोक्न सक्दैन । जनताको विश्वास र देशको स्वाभिमानका लागि हामी सधैं अग्रपंक्तिमा रहनेछौं ।”
पोछिल्लो समय कम्युनिस्ट हरु एक हुने भन्दै मादब कुमार र प्रचण्डले पार्टी एकीकृत गर्ने भन्दै बैठक गरिरहेको र एमाले बाट अल्क भएका एकीकृत समाजवादी पार्टीका केही नेता असन्तुष्ट हुदा ओलिको यो सन्देश पार्टी एकीकृतको लागि महत्त्वपूर्ण हुने जनाइएको छ ।
