काठमाडौँ । प्रतिकूल मौसमका कारण तिब्बततर्फको सगरमाथा क्षेत्रमा फसेका तीन सयभन्दा बढी पर्वतारोहीको सफलतापूर्वक उद्धार गरिएको छ ।
चिनियाँ सरकारी सञ्चारमाध्यमका अनुसार शुक्रबार रातिदेखि शनिबारसम्म लगातार परेको भारी हिमपातका कारण सगरमाथा क्षेत्रमा करिब एक हजार पर्वतारोही फसेका थिए । तीमध्ये हालसम्म ३५० जनाभन्दा बढीलाई उद्धार गरिएको र दुई सयभन्दा बढी पर्वतारोहीसँग सम्पर्क स्थापित गरिएको जनाइएको छ ।
तिब्बततर्फको मोहडाबाट सगरमाथा क्षेत्र प्रवेश गरेका पर्वतारोही हिमपात र हावाहुरीका कारण शिविरमै फसेका थिए । प्रतिकूल मौसमका कारण हेलिकप्टरबाट उद्धार कार्यमा कठिनाइ भएको बताइएको छ ।
चीनमा राष्ट्रिय दिवसका अवसरमा साताव्यापी बिदा चलिरहेको र सोही अवसरमा ठूलो संख्यामा मानिसहरू हिमाली क्षेत्र घुम्न पुगेका थिए । तर, आकस्मिक खराब मौसमका कारण सयौं पर्वतारोही र पर्यटक अलपत्र परेका थिए ।
स्थानीय प्रशासन र उद्धार टोलीले द्रुत गतिमा राहत तथा उद्धार कार्य अगाडि बढाइरहेको र बाँकी फसेकाहरूलाई शीघ्र सुरक्षित स्थानमा पुर्याउने प्रयास जारी रहेको अधिकारीहरूले जनाएका छन् ।
