बाबुराम केसि – स्व. रामलाल पुरी स्मृति वडा स्तरीय भलिबल कप–२०८२ को उपाधि मालारानी–४ भलिबल क्लबले हात पारेको छ। सन्धिखर्क नगरपालिका–७ बाघमारा खेलमैदानमा सम्पन्न प्रतियोगितामा मालारानी–४ ले उत्कृष्ट प्रदर्शन गर्दै पहिलो स्थानमा पर्न सफल भएको हो।
चार दिनसम्म चलेको प्रतियोगितामा जिल्लाका विभिन्न स्थानबाट २० टिमले सहभागिता जनाएका थिए। फाइनल खेलमा “खाँचीकोट दरबार युवा क्लब” उपविजेता बनेको छ भने शितगंगा–२ तेस्रो स्थानमा सीमित रह्यो।
खेलको सुरुवातदेखि निरन्तर वर्षा हुँदा खेल अवरुद्ध भए पनि चौथो दिन सफा मौसमबीच फाइनल खेल भव्य रूपमा सम्पन्न भएको आयोजकले जनाएको छ।
असोज २ गते विशेष समारोहबीच उद्घाटन गरिएको प्रतियोगितामा विभिन्न संघ–संस्था, सामाजिक व्यक्तित्व र स्थानीय सरोकारवालाले पुरस्कार तथा सहयोगको व्यवस्था गरेका थिए।
खाँचीकोट सेवा समाजको आयोजनामा पहिलोपटक भएको स्मृति कप भलिबल प्रतियोगिता भव्य र सभ्य ढंगले सम्पन्न भएको आयोजक समितिले जनाएको छ। साथै आगामी दिनमा पनि यस्ता खेल हरु आयोजना गर्ने समेत जानकारी दिएको छ। खेलको प्रत्यक्ष लाइभ अर्घाखाँची बुलेटिनले समेत निरंतरता दिएको थियो ।
