काठमाडौं । नवनियुक्त तीन मन्त्रीहरूले आज पद तथा गोपनीयताको शपथ लिएका छन्। शीतल निवासमा आयोजित विशेष समारोहमा राष्ट्रपति रामचन्द्र पौडेलले उनीहरूलाई शपथ ग्रहण गराएका हुन्।
प्रधानमन्त्री सुशीला कार्कीले आइतबार नयाँ मन्त्रिपरिषद् विस्तार गर्दै रामेश्वर खनाललाई अर्थ मन्त्रालय, ओमप्रकाश अर्याललाई गृहमन्त्रालय र कुलमान घिसिङलाई ऊर्जा मन्त्रालयको जिम्मेवारी दिएकी थिइन्। साथै, गृहमन्त्री अर्याललाई कानून, न्याय तथा संसदीय मामिला मन्त्रालय र ऊर्जा मन्त्री घिसिङलाई भौतिक पूर्वाधार तथा सहरी विकास मन्त्रालयको समेत अतिरिक्त जिम्मेवारी तोकिएको छ।
शपथ लिएलगत्तै उनीहरूले आजैदेखि पदभार सम्हाल्ने तयारी गरेका छन्। नयाँ मन्त्रीहरूमाथि मुलुकको आर्थिक व्यवस्थापन, सुरक्षा संयन्त्र सुदृढीकरण र ऊर्जा तथा पूर्वाधार विकासलाई तीव्र गतिमा अघि बढाउने ठूलो जिम्मेवारी आएको छ।
शपथ ग्रहण कार्यक्रममा प्रधानमन्त्री कार्की, उपराष्ट्रपति रामसहाय प्रसाद यादव, राष्ट्रियसभाका अध्यक्ष नारायण दाहाल, पूर्वप्रधानमन्त्री बाबुराम भट्टराई, प्रधानन्यायाधीश प्रकाशमान सिंह राउतसहित उच्चपदस्थ अधिकारीहरू सहभागी थिए।
नयाँ मन्त्रीहरूको नामावलीलाई “व्यावसायिक दक्षता र अनुभवलाई प्राथमिकता दिने” प्रयासको रुपमा लिएको बताए पनि तत्कालीन राजनीतिक चुनौतीहरूलाई कसरी सामना गर्ने भन्ने सवाल भने यथावत् रहेको धेरैको भनाइ छ ।
