काठमाडौं, –बागमती प्रदेशका नवनियुक्त मुख्यमन्त्री इन्द्रबहादुर बानियाँले आफूले राज्यबाट पाउने तलब, भत्ता तथा कुनैपनि सरकारी सुविधा नलिने घोषणा गरेका छन्।
मंगलबार नियुक्तीको दिनै राति पत्रकार ऋषि धमलासँग प्राइम टिभीमा विशेष कुराकानी गर्दै उनले यस्तो घोषणा गरेका हुन्।
“म एउटा फोटो झुण्ड्याउनका लागि मुख्यमन्त्री बनेको होइन,” उनले अन्तर्वार्तामा प्रष्ट पारे, “संघीयताको सफल कार्यान्वयनको मेरुदण्ड भनेकै प्रदेश हो, त्यसैले म प्रदेशको सेवा गर्न आएको हुँ।”
मुख्यमन्त्री बानियाँले प्रदेशको समृद्धिको लागि आफू चुनाव लडेको भन्दै पार्टीभित्रको सहमति कार्यान्वयन गर्न आफू दलको नेता बनेको बताए।
उनले थपे, “मैले बहादुर सिंह लामासँग आलोपालो नेतृत्व गर्ने सहमति सभापति शेरबहादुर देउवाको रोहवरमा गरेको थिएँ। उहाँको राम्रा नीति, योजना र निर्णयलाई निरन्तरता दिनेछु।”
यसअघि बानियाँ र लामाबीच दलको नेताको विषयमा विवाद देखिएको थियो। अन्ततः पार्टीभित्रको सहमतिअनुसार बानियाँलाई दलको नेता र मुख्यमन्त्री बनाउने निर्णय भएको हो।
