काठमाडौं, – विभिन्न सरकारी कार्यालय, शैक्षिक संस्था र बैंकहरूको नक्कली छाप तथा कागजात बनाउने कार्यमा संलग्न एक व्यक्ति काठमाडौंबाट पक्राउ परेका छन्। केन्द्रीय अनुसन्धान ब्यूरो (CIB) बाट खटिएको प्रहरी निरीक्षकको टोलीले काठमाडौं महानगरपालिका–३, महाराजगञ्ज चोक नजिकबाट झापा धरमपुर स्थायी निवासी हाल काठमाडौं महानगरपालिका–१० मा बसोबास गर्दै आएका ५२ वर्षीय सफराज खड्कालाई पक्राउ गरेको हो।
खड्काको डेरा तलासी गर्दा TU, CTEVT, HSEB, NEB लगायत शैक्षिक संस्थाका नक्कली होलोग्रामहरू, विभिन्न सरकारी निकायहरू (मालपोत, नापी, नगरपालिका, वडा, प्रहरी, कर कार्यालय, जिल्ला अदालत) का रबर स्ट्याम्प, बैंक तथा वित्तीय संस्थाहरूका नक्कली स्टेटमेन्ट र लेटरप्याड, विभिन्न शैक्षिक संस्थाहरूका प्रमाणपत्रहरू, साथै प्रिन्टर २ थान, सीपीयू १ थान, स्क्यानर १ थान, रबर स्ट्याम्प बनाउने मेसिन १ थान र मोबाइल १ थान बरामद गरिएको प्रहरी निरीक्षकको भनाइ छ।
प्रारम्भिक अनुसन्धानमा खड्काले विगत दुई वर्षदेखि निजी पसलमार्फत यस्ता नक्कली सामग्री तयार गर्दै आएको खुलेको छ। उनले WhatsApp तथा Viber जस्ता सामाजिक सञ्जालमार्फत ग्राहकहरूसँग सम्पर्क गरी अर्डर लिने र नक्कली कागजात तयार पारेर वितरण गर्ने गरेको पुष्टि भएको छ।
उक्त कार्यलाई लिखतसम्बन्धी कसूर अन्तर्गत अनुसन्धान अघि बढाइएको छ। सम्मानित काठमाडौं जिल्ला अदालतबाट पाँच दिनको म्याद थप लिई थप अनुसन्धान भइरहेको प्रहरी निरीक्षकको टोलीले जनाएको छ।