- मलेसियाको क्वालालम्पुरमा गरिएको विशेष अभियानमा ४७२ विदेशी नागरिक पक्राउ परेका छन्।
- अवैध व्यवसाय र विदेशीको भीडभाडबारे गुनासो आएपछि सो कारबाही गरिएको हो।
- पक्राउ परेकामध्ये नेपालीको संख्या हुन सक्ने भए पनि आधिकारिक विवरण आउन बाँकी छ।
क्वालालम्पुर, मलेसिया । मलेसियाको क्वालालम्पुरमा आइतबार सञ्चालन गरिएको एकीकृत मेगा प्रवर्तन अभियान (Op Mega) का क्रममा विभिन्न अध्यागमनसम्बन्धी कसुरमा ४७२ जना विदेशी नागरिक पक्राउ परेका छन्।
अभियानका क्रममा करिब २,५०० विदेशी नागरिकको जाँच गरिएको थियो। सो क्षेत्रमा ठूलो संख्यामा विदेशी नागरिकको उपस्थिति तथा अवैध रूपमा सञ्चालन भइरहेको आशंका गरिएका व्यवसायिक प्रतिष्ठानबारे प्राप्त उजुरीपछि बिहान ११ बजेदेखि कारबाही सुरु गरिएको हो।
उक्त क्षेत्रमा नेपाली श्रमिक तथा व्यवसायीको समेत उल्लेख्य उपस्थिति रहेकाले पक्राउ परेकामध्ये नेपाली नागरिक पनि ठूलो संख्यामा परेको हुन सक्ने आशंका गरिएको छ। यद्यपि, हालसम्म मलेसियाली अध्यागमन विभागले पक्राउ परेका ४७२ जनाको राष्ट्रियता अनुसारको विवरण सार्वजनिक गरेको छैन।
पक्राउ परेका नेपाली नागरिकको वास्तविक संख्या भने सम्बन्धित निकायबाट आधिकारिक विवरण सार्वजनिक भएपछि मात्र स्पष्ट हुनेछ।
