रुपन्देही — सियारी गाउँपालिका–७, कनरी क्षेत्रबाट लागू औषधसहित दुई युवालाई प्रहरीले पक्राउ गरेको छ। जिल्ला प्रहरी कार्यालय रुपन्देहीबाट खटिएको टोलीले शंका लागी चेकजाँच गर्ने क्रममा उनीहरूलाई पक्राउ गरेको हो।
प्रहरीका अनुसार लु.६२.प.११०९ नम्बरको मोटरसाइकलमा सवार पर्वत जिल्ला धौलागिरी गाउँपालिका–३ निवासी २४ वर्षीय युवराज पुन र मोटरसाइकलको पछाडि सवार पाल्पा जिल्ला तानसेन नगरपालिका–१४ का २१ वर्षीय बिकास ज्ञवालीलाई नियन्त्रणमा लिइएको हो।
निजहरूको खानतलासी गर्दा Diazepam, Buprenorphine Hydrochloride र Promethazine नामक लागू औषधका ९०/९० एम्पुल फेला परेको प्रहरीको भनाइ छ। उनीहरू सवार मोटरसाइकलसहित पक्राउ परेका हुन्।
पक्राउ परेका दुवै जनामाथि हाल आवश्यक अनुसन्धान भइरहेको जिल्ला प्रहरी कार्यालय रुपन्देहीका प्रवक्ता प्रहरी नायब उपरीक्षक सुरज कार्कीले नेपाल खोज खबरलाई जानकारी दिएका छन्।