इजरायल डिफेन्स फोर्स (आईडीएफ) ले देशभरका नागरिकहरूलाई सुरक्षित स्थानहरूबाट बाहिर निस्कन अनुमति दिएको छ । तर सेनाले नागरिकलाई सुरक्षित स्थानबाट धेरै टाढा नजान पनि सचेत गराएको छ ।
बीबीसीका अनुसार इरानबाट प्रहार गरिएका क्षेप्यास्त्रहरू रोक्न सैन्य कारबाही चलिरहेको भन्दै सर्वसाधारणलाई सुरक्षित स्थानमा बस्न भनिएको केही समयपछि सेनाले उक्त कुरा बताएको हो ।
केही समयअगाडि सेनाले जनतालाई अर्को सूचना नआएसम्म सुरक्षित स्थानहरूमा जान निर्देशन दिएको थियो ।
आईडीएफले आफ्ना नागरिकलाई भनेको छ, ‘कृपया गृह मोर्चा कमाण्डका निर्देशनहरू पालना गर्न जारी राख्नुहोस्।’
सेनाले पछिल्लो एक घन्टामा इरानबाट प्रक्षेपण गरिएका ‘दर्जनौँ’ क्षेप्यास्त्रहरूमध्ये केहीलाई रोकेको दाबी गरेको छ ।
‘जहाँ क्षेप्यास्त्र खसेको रिपोर्ट आएको छ, ती स्थानहरूमा अहिले खोजी तथा उद्धार टोली परिचालित छन्,’ सेनाले भनेको छ ।
रातको साढे एक बजेतिर जेरुसेलममा दुई मिनेट जति साइरन बजेको छ ।
यो अघिल्लो रात २४ घन्टा अगाडि साइरन बजेपछि दोस्रोपटक सुनिएको हो । झ्यालबाट हेर्दा आकाशमा धेरै ड्रोनहरू उडिरहेको देखिएको र ठूला तथा नजिकैका विस्फोटका आवाज सुनिएका र झ्यालहरू पनि काँपिरहेका छन् ।
इजरायलमा व्यापक रूपमा प्रयोग हुने साइरन एपमा देशभर ‘रेड एलर्ट’ देखाइएको छ।
समाचार संस्थाहरूले यी आवाजहरू आक्रमणका हुन् कि इरानी हमला रोक्न इजरायलले गरेको प्रत्याक्रमणका हुन् भन्ने स्पष्ट नखुलेको जनाएको छ ।
इजरायल र इरान दुवैले पछिल्ला आक्रमणपछि आफूहरू पछि हट्ने अवस्थामा नरहेको जनाएका छन् । उनीहरूले युद्ध सुरु भएको भन्दै थप आक्रमण गर्ने संकेत देखाएका छन् ।
यता, इरानको इस्लामिक रिभोल्युसनरी गार्ड (आईआरजीसी) ले जारी गरेको एक विज्ञप्तिमा उनीहरूले इजरायलका ‘दर्जनौं ठाउँ, सैन्य केन्द्रहरू र एयरबेसहरू’ मा आक्रमण गरेका उल्लेख छ ।
विज्ञप्तिअनुसार, इरानले यो सैन्य कारबाहीलाई “ट्रू प्रमिस ३” नाम दिएको छ। विज्ञप्तिमा यस अपरेसनका थप विवरणहरू पछि सार्वजनिक गरिने बताइएको छ ।
यसैबीच, इजरायली राष्ट्रिय एम्बुलेन्स सेवाले तेल अवीभ महानगर क्षेत्रका कम्तीमा पाँच जना घाइते भएका र उनीहरूलाई अस्पताल लगिएको जनाएको छ ।
