अर्घाखाँची – आज दिउँसो अर्घाखाँची जिल्लाको सन्धीखर्क नगरपालिका–१० स्थित अर्घा मन्दिरबाट सन्धीखर्कतर्फ आउँदै गरेको लु ६० प ९७८५ नम्बरको मोटरसाइकल अनियन्त्रित भई करिब २५ मिटर तल खस्दा एक जनाको मृत्यु भएको छ भने अर्का एक जना घाइते भएका छन्।
दुर्घटनामा परेर मोटरसाइकल चालक स्याङ्जा जिल्ला बालिङ नगरपालिका–८ का ६० वर्षीय डम्बर बहादुर खत्रीको घटनास्थलमै मृत्यु भएको जिल्ला प्रहरी कार्यालय अर्घाखाँचीले जनाएको छ।
- Advertisement -
मोटरसाइकलको पछाडि सबार अर्घाखाँची जिल्लाको मालारानी गाउँपालिका–५ बागी बस्ने २६ वर्षीया सुनिता खड्का घाइते भएकी छन्। उनको हात, खुट्टा र ढाडमा चोट लागेको प्रहरीले जनाएको छ र अवस्था मध्यम रहेको छ।
दुबै जनालाई उपचारका लागि जिल्ला अस्पताल अर्घाखाँची लगिएकोमा चिकित्सकले चालक डम्बर बहादुर खत्रीलाई मृत घोषणा गरेका छन्।
