काठमाडौँ– चालु आर्थिक वर्ष २०८१/८२ को ९ महिना (साउन-चैत) मा काम खोज्दै ६ लाख ७ हजार ८ सय ७४ युवा विदेशिएका छन् ।
वैदेशिक रोजगार विभागका अनुसार चैतमा मात्र ७३ हजार ४ सय ३ युवाले श्रम स्वीकृति लिएका हुन । फागुनसम्म यो संख्या ५ लाख ३४ हजार ४ सय ७१ थियो ।
तथ्यांक अनुसार यस वर्ष औसत मासिक ६७ हजार ५ सय ४१ युवाले कामको खोजीमा देश छाडेका छन् । दैनिक औसत यो संख्या २२५१.३८ हुन आउँ छ ।
यस वर्ष साउनमा ५९ हजार ५ सय ७५ जना बिदेसिएको तथ्यांक छ । भदौमा ५७ हजार ४ सय ९३, असोज ५३ हजार ५ सय २५, कात्तिक ७० हजार ९ सय ९०, मंसिर ८४ हजार २ सय २६ र पुसमा ६७ हजार २ सय ५८ जना विदेशिएका हुन ।
त्यस्तै माघमा ७२ हजार ४ सय ४१ र फागुनमा ६८ हजार ९ सय ६३ तथा चैतमा ७३ हजार ४ सय ३ युवाले श्रम स्वीकृति लिएका छन् । चाडबाड लगत्तै नेपाली बढी विदेश जाने गरेको ट्रेन्ड दोहोरिएको हो ।
यस वर्ष सबैभन्दा धेरै नेपालीको गन्तव्य युएई रहेको छ । चैत २०८१ मा मात्र २३ हजार ६ सय ७१ युवाले यस मुलुकका लागि श्रम स्वीकृति लिएको देखिन्छ ।
योसँगै ९ महिनामा युएई जाने नेपालीको संख्या १ लाख ९६ हजार ९ सय २१ जना रहेको छ । यस वर्ष कुल १ सय ८ देशमा नेपाली श्रम स्वीकृति लिएर गएको देखिएको छ । यस वर्ष दोस्रो स्थानमा साउदी अरब र तेस्रो स्थानमा कतार छ ।
त्यसपछि मलेसिया र कुवेत लोकप्रिय गन्तव्यमा पर्छन् । यस वर्ष मलेसियाबाट नयाँ माग नआउँदा नेपालीको संख्या घट्दो टेन्डमा रहेको छ । साइप्रस, बहराइन, जापान, कोरिया, रोमानिया, ओमान सहित देशमा धेरै नेपाली कामको खोजीमा पुगेका छन् ।
नेपालबाट विदेशिनेमध्ये अर्धदक्ष कामदारको बाहुल्य छ । यद्यपि, अदक्ष कामदारको विदेश यात्रा अझै रोकिन सकेको छैन । चैत महिनामा मात्र विदेशिएका ७३ हजार ४ सय ३ मध्ये २१ हजार ६ सय ९५ युवा अदक्ष छन् ।
अर्धदक्ष युवा ४२ हजार ४ सय ५४ छन् । दक्ष कामदार संख्या ८ हजार ८ सय ९९ छ । व्यावसायिक कामदार २ सय ७७ र अतिदक्ष कामदार ७८ जनाले मुलुक छाडेको तथ्यांकमा देखिन्छ ।