कोरिया – दक्षिण कोरियाको दक्षिणी क्षेत्रहरूमा फैलिएको विनाशकारी डढेलोले ठूलो मानवीय तथा भौतिक क्षति पुर्याएको छ। तीव्र हावाका कारण तीव्र गतिमा फैलिएको आगलागीले हालसम्म २४ जनाको ज्यान लिइसकेको छ, जसमा एक हेलिकप्टर पाइलट समेत छन्। साथै, २७,००० भन्दा बढी मानिसहरू आफ्नो घर छोड्न बाध्य भएका छन्।
२०० भन्दा बढी संरचना नष्ट, प्राचीन बौद्ध मन्दिर ध्वस्त
डढेलोका कारण २०० भन्दा बढी संरचनाहरू पूर्ण रूपमा नष्ट भएका छन्। दक्षिण कोरियाको ऐतिहासिक गउन्सा (Gounsa) बौद्ध मन्दिर समेत आगलागीमा परेर ध्वस्त भएको छ। झन्डै ४३,३३० एकड (१७,५३५ हेक्टर) क्षेत्रफल जलेर खरानी भइसकेको छ, जसले गर्दा यो दक्षिण कोरियाको इतिहासमा तेस्रो सबैभन्दा ठूलो डढेलो भएको छ।
विशेष प्रकोप क्षेत्र घोषणा, हजारौं अग्निनियन्त्रक परिचालन
दक्षिण कोरियाको सरकारले आगलागीबाट सबैभन्दा बढी प्रभावित क्षेत्रहरूलाई “विशेष प्रकोप क्षेत्र” घोषणा गरेको छ। आगलागी नियन्त्रणका लागि हजारौं अग्निनियन्त्रकहरू, सैनिकहरू, हेलिकप्टरहरू, र अन्य उद्धार टोली परिचालन गरिएको छ।
डढेलो मानव कारणले लाग्न सक्ने आशंका
अधिकारिहरूका अनुसार, केही स्थानहरूमा आगलागी मानवीय त्रुटिका कारण भएको हुन सक्ने आशंका गरिएको छ। प्रारम्भिक अनुसन्धान अनुसार घाँस सफा गर्न आगो प्रयोग गर्नु, वेल्डिङ कार्यका झिल्का, वा अन्य लापरवाहीजन्य कारणले आगो लागेको हुनसकने आशका गरिएको छ ।
स्थिति अझै गम्भीर, नियन्त्रण प्रयास जारी
आगलागी अझै पूर्ण रूपमा नियन्त्रणमा आउन सकेको छैन, र सरकार तथा उद्धारकर्मीहरू डढेलो नियन्त्रण गर्न निरन्तर प्रयास गरिरहेका छन्। प्रभावित समुदायहरूलाई सुरक्षित स्थानमा सार्नका साथै राहत तथा पुनःस्थापना कार्य तीव्र पारिएको बताइएको छ।
